Vil verne sjeldne skogar i Rogaland – no kan du seie di meining

Statsforvaltaren i Rogaland har sendt forslag om vern av to skogområde på offentleg høyring, i tråd med naturmangfaldlova. Fristen for å sende inn merknadar er 6. juli 2026.

– Dette er skog som har fått utvikle seg over svært lang tid. Her finst det naturverdiar som det er viktig å ta vare på no, seier Solbjørg Engen Torvik i Statsforvaltaren i Rogaland.

Dei to områda som er foreslått verna som naturreservat, er Djupalia i Sandnes kommune (om lag 1450 dekar) og Riskadalsvatnet i Hjelmeland kommune (om lag 224 dekar).

Vernar i samarbeid med grunneigarane

Begge områda er tilbydde for vern gjennom ordninga med frivillig skogvern. Det betyr at grunneigarane sjølve ønskjer vern, og får økonomisk kompensasjon frå staten.

– Frivillig skogvern er ei ordning som fungerer godt. Når grunneigarane sjølve tek initiativ, får me både betre prosessar og grunneigarar som er stolte av verneområdet sitt og vil bidra med å ta vare på det, seier Torvik.

Gamal skog med rikt liv

Skogane som no er på høyring, består i hovudsak av rik edellauvskog med store, gamle tre av mellom anna eik, alm og ask. Mange av trea er styva – ein tradisjonell måte å bruke skogen på, som også gir leveområde for ei rekkje artar.

Særleg området ved Riskadalsvatnet peikar seg ut med eit stort mangfald av sjeldne og trua artar.

– Mange artar er heilt avhengige av gammal skog og død ved. Når slike område forsvinn bit for bit, mistar vi også livsgrunnlaget for desse artane. Difor er det så viktig å ta vare på dei områda me framleis har, seier Torvik.

Djupalia landskap. Foto: Solbjørg Engen Torvik  

For naturen – og dei som kjem etter oss

Om lag halvparten av dei trua artane i Noreg er knytte til skog. Skogvern er derfor eitt av dei viktigaste tiltaka for å ta vare på naturmangfaldet.

– Når vi vernar skog, sikrar me at naturen får utvikle seg vidare – til glede og nytte for kommande generasjonar, seier Torvik.

Stortinget har sett som mål at 10 prosent av skogen i Noreg skal vernast. I dag er om lag 5,5 prosent verna, ifølgje Miljødirektoratet.

Slik kan du gi innspel

Alle kan sende inn merknadar til verneforslaga.

Frist for uttale til høyringa er 06. juli 2026 og sendast skriftleg med brev eller e-post til Statsforvaltaren i Rogaland:

Postadresse: Statsforvaltaren i Rogaland, Miljøvernavdelinga, Pb. 59, 4001 Stavanger

E-postadresse: sfropost@statsforvalteren.no 

Hugs å merke sendinga med saksnummer 2026/50, og namn på området innspelet gjeld.

Høyringsdokument, kart og meir informasjon om områda ligg tilgjengeleg på nettsida til Statsforvaltaren. Avgrensinga i oppstartsmeldinga, kan finnast på kart i Naturbase og Temakart Rogaland. Me gjer merksam på at avgrensingane ikkje er endelege og kan endrast.

Områda er tilbodne for vern av skogeigarane gjennom ordninga med frivillig vern av skog. Her finn du meir informasjon om frivillig skogvern.

Styva ask i Riskadalsvatnet. Foto: Solbjørg Engen Torvik