Presseinvitasjon: Kongeparet besøker Rogaland 28.–30. mai
Hans Majestet Kongen og Hennar Majestet Dronninga legg ut på ny fylkestur i mai 2024. I Rogaland går turen til Lund, Randaberg og Vindafjord.
Dette innhaldet er meir enn eitt år gammalt. Informasjonen kan derfor vere utdatert.
Dette er ikkje tilfeldig. Lund, Randaberg og Vindafjord er dei tre kommunane i Rogaland som Kongeparet ennå ikkje har vore på offisielt besøk i.
Fylkesturen til Kongeparet startar i Agder søndag 26. mai. Tysdag 28. mai passerer dei kongelege fylkesgrensa til Rogaland – og her skal dei vera i tre dagar. Kongeskipet Norge blir brukt under heile fylkesturen.
Rogaland er landets fjerde største fylke
Rogaland er eit av dei minste fylka i areal, men det er landets fjerde største målt etter folketal. I 2024 blei rogalending nummer 500 000 fødd.
Fylket har store landskapsvariasjonar. Folk har tatt i bruk landskapet gjennom fleire tusen år, og ein kombinasjon av natur- og kulturlandskap pregar Rogaland.
Kongeparet skal få oppleva tre ulike regionar; Dalane (Lund kommune), Nord-Jæren (Randaberg) og Haugalandet (Vindafjord).
Rogaland er inndelt i 23 kommunar. Stavanger er administrasjonssenteret og er hovudsetet for både Rogaland fylkeskommune og Statsforvaltaren i Rogaland. Fylkesordførar er Ole Ueland (H). Bent Høie er statsforvaltar.
28. mai i Lund kommune
Lund kommune i Dalane er kjent som ein industrikommune med produksjon av alt frå tresko, bjøller, gyngestolar og vindauge. Den største bedrifta er NorDan. I tillegg er det ei aktiv landbruksnæring i kommunen. Kommunen ligg sør i Rogaland, midtvegs mellom Kristiansand og Stavanger. Lund har litt over 3 100 innbyggarar. Ein stor del av dei bur i den einaste tettstaden i kommunen, administrasjonssenteret Moi.
I Lund blir Moi stadion ramme for besøket. Kongeparet kjem kl. 11.30.
29. mai i Randaberg kommune
Randaberg er Noregs minste landkommune. Kommunen er kjent som ein viktig jordbrukskommune. Randaberg ligg som Jærens nordre spiss, med Stavanger som næraste nabo. Randaberg har i underkant av 12 000 innbyggarar.
I Randaberg går Kongeparet i land i Goavika kl. 11.00. Turen først til Vår Energi Arena Randaberg (kort besøk), deretter til Torget og hovudarrangementet i sentrum av Randaberg kl. 11.30.
30. mai i Vindafjord kommune
Vindafjord ligg på halvøya Haugalandet, nord i Rogaland fylke. Kommunen grensar i sørvest mot Tysvær, i søraust mot Suldal – og i aust mot Etne i Vestland fylke. Vindafjord kommune har om lag 9 000 innbyggarar. Kommunen har eit svært samansett næringsliv, hovudsakeleg basert på industri, teknologi, landbruk og tenesteytande næring.
I Vindafjord går Kongeparet i land kl. 11.00 i Ølen sentrum.
Detaljprogrammet for besøket i dei tre kommunane er framleis under arbeid.
Akkreditering innan 22. mai 2024
Presse som ønskjer å dekkja heile eller delar av fylkesbesøket til Kongeparet i Rogaland, søker akkreditering her innan 22. mai 2024 kl. 16.00.
Kan bli forbod mot droneflyging over arrangementsområda
Politiet vurderer å innføra flyforbodssoner for drone over arrangementsområda under Kongeparets besøk i Rogaland 28.–30. mai. I denne vurderinga er det behov for informasjon om eventuell planlagt sivil dronebruk, blant anna for å kunna legga til rette for profesjonell dronebruk. Dersom bruk av drone er aktuelt for redaksjonen din, send ein e-post til kommunikasjonssjef John Gunnar Skien hos Statsforvaltaren i Rogaland, med namn på dronepilot, redaksjon og mobilnummer. Fristen er 22. mai kl. 16.00. Statsforvaltaren i Rogaland formidlar ei samla oversikt vidare til politiet.