Tre nye skogområde er verna som naturreservat i Rogaland
Kongen i statsråd vedtok 24. juni 2025 vern av 32 skogområde i Norge. I Rogaland er tre nye skogområde verna som naturreservat, med samla areal er på om lag 7083 dekar.
- Griggelia naturreservat, Sandnes kommune, ca. 1128 daa
- Honganvik naturreservat, Sauda kommune, ca. 2017 daa
- Ulvaskog naturreservat, Strand kommune, ca. 3938 daa
Vernet er basert på frivillig vern av skog, der skogeigar får erstatning for skogen som blir verna.
Vernevedtaket med lenker til Kongeleg resolusjon, verneforskrifter og vernekart for dei einskilde områda, samt eit oversiktskart over alle dei 32 områda, er lagt ut på Klima- og miljødepartementets si heimeside. Lenker til Kongeleg resolusjon, vernekart og verneforskrifter, samt eit oversiktskart over dei tre områda i Rogaland ligg også i høgre marg her.
Rognebærtre i Honganvik naturreservat i Sauda. Foto: Sobjørg Torvik Engen
Føremålet med vernet er å ta vare på trua, sjeldan eller sårbar natur i svært varierte skogområde med boreal lauvskog med stort innslag av rogn, rike og fattigare edellauvskogar med store førekomstar av store gamle eiketre som inngår i naturtypen hol eik, samt dei andre edellauvtrea ask, alm, lind, i tillegg til barlind. To av områda inneheld kystfuruskog med boreonemoral regnskogar og gamal fattig sumpskog, samt flomskogsmark i tilknyting til elv. Områda inneheld også eit stort tal nær trua og trua artar og fuktkrevjande arter i regnskogsmiljø. Det er eit mål å ta vare på verneverdiane i mest mogleg urørd tilstand, med stadeigne artar og naturtypar og naturleg skogdynamikk, og eventuelt vidareutvikle dei.
Lungenever i Griggelia naturreservat i Sandnes. Foto: Einar Heegaard.
Hinnebregne i Griggelia naturreservat i Sandnes. Foto: Einar Heegaard.
Frivillig vern av skog
Frivillig vern av skog er eit samarbeid mellom grunneigarar, skogeigarlaga (i dette tilfellet AT Skog og Norskog), Statsforvaltaren og Miljødirektoratet. Verneprosessen startar ved at grunneigar tilbyr sin skog for vern mot eit vederlag. Skogeigarlaga hjelper grunneigarane i kontakt med Statsforvaltaren og Miljødirektoratet. Gjennom oppstartsmelding og høyringsprosess kjem ein saman fram til avgrensinga av verneområdet og ordlyden i verneforskrifta som er tilfredsstillande for partane. Samtidig forhandlar skogeigarlag på vegne av grunneigar med statens skogsakkunnig om erstatninga for skogen. Vederlaget som grunneigar får for skogen er skattefritt og ordninga inneber ingen utgifter for grunneigarane.
Har du skog og lurar på ordninga frivillig skogvern er det berre å ta kontakt med Statsforvaltaren i Rogaland.
Griggelia naturreservat i Sandnes. Foto: Einar Heegaard.
Kontaktpersonar
Lenkjer
