Tid for å søkje tilskot til investeringar i utmark

Formålet med ordninga «Tilskot til tiltak i beiteområde» er å leggje til rette for best mogleg utnytting av beite i utmark, redusere tap av dyr på utmarksbeite og fremje fellestiltak i beiteområda.

Tiltak som kan få tilskot

Tiltak det kan søkjast tilskot til er til dømes:

• sperregjerde
• sanke- og skiljeanlegg
• bruer og ferister
• gjetar- og sankehytter
• anlegg av, rydding og utbetring av driftevegar
• saltsteinautomatar
• transportrammer
• teknologi og elektroniske anordningar
• planleggings- og tilretteleggingsprosjekt

Regionale prioriteringar

I Rogaland har vi valt å prioritere tiltak som støttar formålet med ordninga.

Høgast prioritet har installasjonar som lettar tilgang og bruk av utmarksbeite, tilsyn i beitesesong, samt sanking og ettersanking på hausten. Lågare prioritet har meir kostnadskrevjande prosjekt, som til dømes bygging av gjetar- og sankehytter.

Tiltaka skal vere investeringstiltak og/eller planleggings- og tilretteleggingstiltak. Søknadar til drift, som til dømes abonnementskostnader og drift av basestasjonar for elektroniske anordningar, fell utanfor regelverket.

Beitelaga må gjere greie for behova dei har i sitt område. Sjølv om potten framleis er avgrensa, er det viktig at beitelaga søkjer om dei tiltaka dei har behov for, slik at ein får oversikt over dei reelle behova i beiteområda.

Kven kan søkje?

Tilskotet er hovudsakleg berekna for beitelag og andre former for organisert samarbeid. Lag, foreiningar og føretak som driv næringsmessig beitedrift kan søkje. Enkeltføretak kan søkje der det på grunn av naturgjevne eller driftsmessige forhold ikkje ligg til rette for samarbeid.

Søk gjennom Altinn

Beite- og sankelag som vil søkje om tilskot, må sende søknad elektronisk gjennom Altinn.no innan 15. mars 2026. Søknaden skal sendast til kommunen der tiltaket skal gjennomførast, eller kommunen som blir berørt av tiltaket.

Ved behov skal det leggjast ved dokumentasjon, til dømes kart over beiteområdet med plassering av tiltaket, nærare skildring av tiltaket, og eventuelle avtalar med grunneigar.

På nettsida til Landbruksdirektoratet finn de meir informasjon om ordninga og lenkje til søknadsskjema i Altinn. 

Kommunane tildeler tilskot etter lokale retningsliner

Etter søknadsfristen går kommunane gjennom søknadene og sender ei prioritert oversikt over søknader og samla behov til Statsforvaltaren i Rogaland. Statsforvaltaren fordeler deretter midlane mellom kommunane etter innmeldt behov, slik at kommunane kan fatte vedtak om tildeling av tilskot. Innvilga tilskot blir utbetalt etterskotsvis når tiltaka er gjennomførte og dokumenterte.

Oppsummering av søknadsomgangen i 2025

I 2025 kom det inn 44 søknadar frå 14 kommunar. Samla kostnader for planlagde investeringstiltak var 6 396 730 kroner, med eit samla søknadsbeløp på 4 293 623 kroner. Potten til fordeling var på 500 000 kroner. 

Det er positivt at talet på søknader aukar, då dette gir betre oversikt over behova i beiteområda. Samstundes krev den økonomiske ramma stram prioritering. Nokre søknadar fell utanfor regelverket, medan andre blir nedprioriterte, mellom anna søknadar frå enkeltføretak som ikkje driv organisert beitebruk i beitelag, og bygging av nye sankehytter.

Den auka tildelinga i 2026 gir likevel betre moglegheiter for å støtte viktige investeringstiltak, og er positivt for beitelaga i Rogaland.