Statsbudsjettet for 2026

På Regjeringen.no finn du alle budsjettdokument og pressemeldingane frå departementa. Særleg aktuelt er Kommunal- og distriktsdepartementet (KDD) sitt budsjettforslag og Grønt hefte, som syner fordelinga av rammetilskotet for den enkelte kommune. I fylkesoversikta finn ein regjeringa sine føreslåtte tiltak og satsingar for Rogaland.

Skjønnstilskot for 2026

Kvart år deler Statsforvaltaren i Rogaland ut ordinære skjønnstilskot etter ei heilskapleg vurdering av økonomi og behov i kommunane.

Skjønnsramma som er tildelt Rogaland for 2026 er på 57,8 millionar kroner. Det er ei auke av skjønnsramma frå 53,5 millionar kroner for 2025. Skjønnsramma har vi igjen delt inn i følgjande tilskot:

• 34 millionar kroner til ordinært skjønnstilskot

• 18 millionar kroner til utvikling og innovasjon (prosjektskjønn)

• 5,8 millionar kroner til restskjønn ved naturskade

Tabellen under syner kor mykje den enkelte kommunen har fått i ordinært skjønnstilskot for 2026. Prosjektskjønn og restskjønn vert fordelt til kommunane seinare. 

Du finn vår grunngjeving for fordelinga av ordinære skjønstilskot i eit eige brev til kommunane, sjå sidemenyen.

Svekka kommuneøkonomi i 2024 – lysare for 2025

Den økonomiske situasjonen til kommunane i Noreg forverra seg i løpet av 2024, der heile tre av fem kommunar hadde eit negativt driftsresultat. Det skuldast i hovudsak ubalanse i drifta, der kostnadane har auka meir enn venta. Kommunane i Rogaland gjer det betre, men det er store skilnader mellom kommunane.

For 2025 ser det lysare ut. Veksten i dei frie inntektene er på 15,1 milliardar kroner – høgare enn nokon gong. I tillegg er det løyvd 4,1 milliardar kroner til meirkostnader i pensjon, mellom anna til den nye offentlege AFP-ordninga.

Framleis vil det vere behov for store omstillingar i kommunane, for å tilpasse seg kostnadsnivået og tenesteaktiviteten. Særleg stort er behovet kring helse og omsorg. Samanlikna med 2025 vil utgiftsbehovet auke med over 50 milliardar kroner i 2035 blant eldre over 67 år. Samstundes vil tenestebehovet blant unge under 18 år gå ned med 12 milliardar kroner. For same periode forventar ein at over 200 kommunar vil ha færre personar i yrkesaktiv alder totalt. Allereie no melder mange kommunar om vanskar med å rekruttere nok tilsette.

Kommuneopplegget 2026

Regjeringa foreslår ein realvekst i frie inntekter på 4,2 milliardar kroner til kommunesektoren, og av desse 3,2 milliardar kroner til kommunane. Tar ein høgde for meirkostnader til demografi, er handlingsrommet redusert til 1,3 milliardar kroner, der om lag 85 prosent går til kommunane, og 15 prosent til fylkeskommunane. Det er også verd å huske at det kom 1,6 milliardar kroner ekstra i revidert nasjonalbudsjett til kommunesektoren. Midla frå RNB blir vidareført i 2026.

Det er foreslått at den kommunale skattøyren blir 11,35 pst. for 2026 for kommunane. Det er anslått at skatteinntektene med denne skattøyren, vil utgjere om lag 40 pst. av kommunesektoren sine samla inntekter i 2026.

Den kommunale deflatoren går ned

Den kommunale deflatoren er ein indeks for berekna kostnadsutvikling i kommunal sektor i form av pris- og lønnsvekst og bidrag frå meirkostnader pensjon. I 2025 var den kommunale deflatoren på 4,7 prosent inkludert bidrag frå pensjon. For 2026 er deflatoren sett til 3,5 prosent, sjå tabell under. For 2026 er det anslått nullvekst i meirkostnadar til pensjon.

Aktuelt i Rogaland

Nytt tinghus i Stavanger

Regjeringa foreslår å løyve 8 millionar kroner til vidareføring av forprosjektet til eit nytt tinghus i Stavanger.

Havvindtilskot til Utsira kommune

Regjeringa foreslår å løyve Utsira kommune 3 millionar kroner og gje eit tilsegn på 6 millionar kroner, som er direkte påverka av havvindutbygging i Utsira Nord. Tilskotet er ei særordning og gjeld Utsira kommune berre denne eine gongen. Grunngjevinga for midlane er kommunens storleik og geografiske plassering.