Privat grunnskuleopplæring i heimen

Skoleåret 2025/2026 er det 37 barn i Rogaland som får privat grunnskoleopplæring. Denne opplæringa inneber at foreldra sjølve underviser barna sine heime. Kommunen har plikt til å føre tilsyn med opplæringa i heimen.

Publisert 22.04.2026

Privat grunnskuleopplæring i heimen er regulert i opplæringslova

Etter opplæringslova §§ 2-1 og 2-2 har alle barn og unge rett og plikt til grunnskuleopplæring, frå det året dei fyller seks år til dei har avslutta 10. trinn. Foreldre kan velje om plikta skal oppfyllast ved ein offentleg skole, ein privat grunnskole eller ved privat grunnskoleopplæring i heimen utført av foreldra.

Privat grunnskoleopplæring i heimen er regulert i opplæringslova § 22-5.

Foreldre må melde frå til kommunen

Foreldre har plikt til å melde frå til kommunen dersom dei skal gi barna privat grunnskuleopplæring i heimen.

Krav til privat grunnskuleopplæring i heimen

Barn og unge som får grunnskoleopplæringa i heimen har rett til å tileigne seg tilsvarande kunnskap som i den offentlege skolen. Privat grunnskoleopplæring er omfatta av same reglar, når det gjeld formål og innhald, som opplæringa i den offentlege grunnskolen. Det betyr at opplæringa i heimen skal:

vere i samsvar med formålet med opplæringa, jf. § 1-3
vere i samsvar med Læreplan for Kunnskapsløftet, jf. § 1-4 andre ledd
følgje fag- og timefordelinga, jf. § 1-6 første ledd
ikkje vere i strid med forbodet mot forkynning, jf. § 14-5
oppfylle krava til korleis opplæringa om kristendom, religion, livssyn og etikk skal leggjast opp, jf. § 14-7

Elevar som får privat grunnskoleopplæring i heimen har ikkje individuelle rettigheiter som t.d. individuelt tilrettelagd opplæring, personleg assistanse, fysisk tilrettelegging, særskild språkopplæring m.m. Dersom foreldre meiner at barnet ikkje har eit tilfredsstillande utbytte av opplæringa som blir gitt i heimen, må foreldra skrive barnet inn i den offentlege grunnskolen, ev. ved ein godkjend privat grunnskole.

Tilsyn

Kommunen skal føre tilsyn med at private grunnskoleopplæringa i heimen oppfyller krava i § 22-5 andre ledd.

Når kommunen får melding frå foreldre om at eit barn skal få slik opplæring, skal kommunen opne tilsyn innan tre månader etter at opplæringa tar til.

Kommunen kan krevje at barn som får privat grunnskuleopplæring i heimen, tar prøver som kan vise om opplæringa oppfyller krava i andre ledd.

Kjem kommunen fram til at opplæringa i heimen ikkje oppfyller krava, skal barnet gå på skulen jf. § 22-5 fjerde ledd.

Samarbeid mellom foreldra og kommunen

Tilsynet skal skje i samarbeid med foreldra. Foreldra har plikt til å samarbeide med kommunen på ein slik måte at det blir mogleg å gjennomføre tilsyn. Om dette ikkje er tilfelle, kan kommunen krevje at barnet skal gå i den offentlege skulen eller på ein privat grunnskule.