Sola utfordrar jordvernet
I framlegget til ny kommuneplan i Sola er seks bustadområde, tre massedeponi og eitt næringsområde lagt på dyrka mark. Det er i strid med nasjonale jordverninteresser og Regionalplan Jæren.
Dette innhaldet er meir enn eitt år gammalt. Informasjonen kan derfor vere utdatert.
Bustadområda vil også vera vanskelege å knytta til eit høgverdig kollektivsystem, og kjem i tillegg i konflikt med nye statlege planretningsliner for samordna bustad-, areal- og transportplanlegging, meiner Fylkesmannen i Rogaland.
Fylkesmannen har motsegn til seks bustadområde, tre massedeponi og eitt næringsområde som Sola kommune har lagt på dyrka mark i framlegget til ny kommuneplan 2015-2026.
Størst nedbygging på Jæren
Dei siste åra har den største nedbygginga av matjord i Noreg skjedd på Jæren. Med dette som utgangspunkt er det nødvendig at Sola og dei andre kommunane på Jæren følgjer opp nasjonale mål om å ta vare på matjord og følgjer opp Regionalplan Jæren. Hovudføremålet med regionalplanen er å sikra ei styrt by- og tettstadsutvikling i regionen, samtidig som landbruksområda blir sikra.
Båthamner i naturområde
Fylkesmannen har også motsegn til to småbåthamner som er plasserte i eit område som er viktig for våtmarksfugl med stort naturmangfald. Båtanlegga er plasserte i Sømmevågen og rett sør for Risavika, inntil grensa Jærstrendene landskapsvernområde.
Lite konkret samfunnsdel
Fylkesmannen meiner at samfunnsdelen til kommuneplanen gir eit godt oversyn over utviklinga og utfordringar i kommunen. Men han er lite konkret i forhold til prioriteringar og mål. Samfunnsdelen manglar ein handlingsdel i samsvar med kravet i plan- og bygningslova § 11-2.
Framlegget til kommuneplan og Fylkesmannen sin uttale finn du i høgremargen.