Stadfestar reguleringsplanen for Holmaneset
Vi stadfestar Bremanger kommune sitt vedtak om å godkjenne reguleringsplanen for hydrogen- og ammoniakkfabrikk på Holmaneset.
Bremanger kommune har gjort ei ny vurdering av reguleringsplanen som legg til rette for etablering av hydrogen- og ammoniakkfabrikk på Holmaneset, etter at vi tidlegare oppheva kommunen sitt vedtak.
Kommunestyret i Bremanger kommune godkjente områdereguleringsplanen for Holmaneset den 18. desember 2025. Ny saksutgreiing omfattar nye vurderingar etter naturmangfaldslova, og kommunen viser elles til tidlegare saksutgreiing.
Det kom inn 8 klagar på vedtaket.
Stadfestar vedtak
Statsforvaltaren har vurdert dei omfattande klagane og kome til at Bremanger kommune si handsaming av saka er forsvarleg og i tråd med gjeldande regelverk. Vi har difor stadfesta Bremanger kommune si godkjenning av reguleringsplanen på Holmaneset.
Den godkjente reguleringsplanen er avgrensa til å gjelde tilrettelegging for etablering av hydrogen- og ammoniakkfabrikk.
Planvedtaket i seg sjølv gir ikkje løyve til gjennomføring av tiltak, men dannar grunnlaget for vidare arbeid med etablering av hydrogen- og ammoniakkfabrikk på Holmaneset.