Biogass frå husdyrgjødsel – det ligg til rette for realisering på Jæren

Eigarane av prosjektet er kommunane Hå, Time og Klepp. Kommunar som samla har om lag 10 prosent av husdyrhaldet i landet. Hå kommune er formell søkjar og prosjektansvarleg. Forskinga blir leia av forskarar frå Norce AS, kommunane, Fylkesmannen i Rogaland, Rogaland fylkeskommune og næringa representert ved Jæren Biogass og Rogaland bondelag.

Føremål med prosjektet

Hovudmålet var å vurdere logistikken for biogassproduksjon og alternativ bruk av biogass og biorest. Ambisjonen er at prosjektet resulterer i faktiske investeringar i nye anlegg.

Biogass, eit viktig klimatiltak

Rogaland har unike føresetnader sett i forhold til mengd husdyrgjødsel, fosforproblematikk, spreieareal for husdyrgjødsel og eksisterande infrastruktur for gass. Fordi avstandane på Jæren er såpass korte vil ikkje transportavstandar vere like avgjerande som i andre område. Dette fordi det er rigging, lasting og lossing som tar tid. Investeringar som er gjort i lagerkapasitet for gjødsel på gardsnivå gir også eit fortrinn. Separering av gjødsla til tørr og våt del er ein føresetnad i prosjektet.

Biogassproduksjon basert på husdyrgjødsel er eit av dei konkrete tiltaka i klimaavtalen mellom regjeringa og jordbruket, og det blir arbeidd for å få biogass registrert inn som ein del av klimagassrekneskapen. 

Kva skjer no?

Analysane i rapporten viser at ein større sentral hub for tørrfraksjonen av husdyrgjødsla vil kunne dekke det meste av behovet for Jæren. Men det er også mogleg å dele dette i to til tre mindre huber.

Nå er det tid for handling. Det er viktige at dette ikkje berre blir ein ny rapport om kor viktig det er å satse på biogass, men at det faktisk gir grunnlag for etablering. Vi er involverte i det å organisere ei vidare oppfølging, og det vil kome meir informasjon om dette på nyåret 2020.

Rapporten frå Norce AS finn du vedlagt.