Totalforsvarsåret 2026

Totalforsvaret er summen av Noreg sine sivile og militære ressursar, som saman bidreg til å førebyggje og handtere kriser, væpna konflikt og krig – og slik ivareta nasjonen sin tryggleik.

Statsforvaltaren si rolle

Statsforvaltaren har ei sentral rolle i å samordne sivile beredskapsaktørar, støtte kommunane og sikre at planverk og øvingar er på plass i heile fylket. I kriser og krig skal Statsforvaltaren bidra til at viktige samfunnsfunksjonar blir oppretthaldne og koordinere sivil støtte til Forsvaret.

Aktivitetar i Rogaland

– Beredskap er eit kontinuerleg arbeid, og Totalforsvarsåret gir oss ei moglegheit til å styrkje dette arbeidet ytterlegare i fylket, seier Fylkesberedskapssjef Reidar Johnsen. I Rogaland vil Totalforsvarsåret prege aktivitetane våre gjennom heile året.

Kommunane skal trene på rolla si i krise og krig, og Statsforvaltaren følgjer opp planverk og beredskap i tett samarbeid med naudetatane, statlege etatar, Sivilforsvaret og Forsvaret.

– Statsforvaltaren skal òg delta i fleire større øvingar gjennom året og leggje til rette for læring og erfaringsdeling på tvers av sektorar, seier Johnsen. Samstundes har vi no stort fokus på korleis næringslivet kan bli endå meir medvitne om si rolle og ansvar i totalforsvaret. Dette gjer vi mellom anna gjennom Totalberedskapskurs for toppleiarar, som blir arrangert i haust saman med Sør‑vest politidistrikt, Forsvaret (HV‑08) og Sivilforsvaret.

Øvingar

Følgjande nasjonale og nordiske øvingar inngår i Totalforsvarsåret 2026:

• Cold Response (mars 2026)
• Nordisk samarbeidsøving (mars 2026)
• Noreg øver (andre halvår 2026)
• Totalforsvarsøvinga TDX 26 (oktober 2026)
• Valiant Duel (oktober 2026)
• Noreg øver befolkninga under Eigenberedskapsveka (oktober 2026)

Angår oss alle

Totalforsvaret handlar òg om befolkninga. Eigenberedskap er eit viktig tiltak som alle – både privatpersonar og verksemder – kan bidra med for å byggje eit meir robust samfunn.

God beredskap og motstandskraft nasjonalt føreset at både styresmakter, verksemder og innbyggjarar bidreg – kvar på sin måte.