Årets Kulturlandskapspris går til Remmem gård

– Prisen er ei anerkjenning av deira viktige innsats for å halde kulturlandskapet i Romsdalen levande og produktivt, seier statsforvaltar Else-May Botten.

Prisen blir overrekt på garden 1. oktober.

Eit landskap med nasjonal verdi

Marius og Linn Kristin driv rundt 1000 dekar jordbruksareal fordelt på Remmem og 20 andre bruk i Romsdalen. Gardsbruka ligg i eit område som Riksantikvaren har peika ut som kulturhistorisk landskap av nasjonal interesse. Landskapet er variert, frå vide flater til stupbratte fjell. Fleire stader ligg det massive steinblokker.

– Marius og Linn Kristin leverer på mange område og har teke på seg eit stort ansvar. Det er krevjande å drive jordbruk i eit slikt landskap. Paret er framifrå representantar for alle som bidreg til å halde kulturlandskapet ope og levande – år etter år, seier Botten.

Allsidig jordbruksdrift

Produksjonen omfattar både korndyrking og gras, og dei har ei ammekubesetning på rundt 100 dyr. Alle dyra beiter i inn- og utmark gjennom sommarhalvåret.

I tillegg til jorda som høyrer til Remmem gård, leiger paret jord frå fleire gardsbruk som ikkje lenger driv aktivt. Bruka er spreidde over store avstandar, og kvar plass har sine særtrekk – noko som krev fleksibel drift og god tilpassing til landskapet.

– Aktiv drift av jordbruksareal er viktig for både lokalsamfunn og matsikkerheit. Marius og Linn Kristin er gode døme på bønder som tek ansvar og skapar ringverknader langt utover sitt eige gardsbruk, seier Botten.

Det er Rauma kommune som har nominert Remmem gård til Kulturlandskapsprisen.