Stenging av laksefiske i Sogn og Fjordane
Fisket etter laks i fleire vassdrag rundt Sognefjorden og Førdefjorden vert i år stengt 14 dagar tidlegare.
Dette innhaldet er meir enn eitt år gammalt. Informasjonen kan derfor vere utdatert.
Miljødirektoratet har fastsett ei forskrift om ekstraordinære reguleringstiltak for fiske etter laks i vassdrag rundt Sognefjorden og Førdefjorden. Vassdrag som ikkje har midtsesongsevaluering og avtale med Fylkesmannen om førehandsavtala tiltak, får redusert fisketida på laks med 14 dagar. For dei fleste vassdraga betyr det at fisket etter laks i år vert avslutta 17. august.
Reduserte fangstar
Bakgrunnen for dei ekstraordinære reguleringstiltaka er at fangstane i sentrale vassdrag i Sogn og Fjordane er vesentleg lågare enn normalt. Tala tyder på at innsiget er avvikande lågt for vassdrag i denne regionen, og under 50 % av kva som ligg til grunn for gjeldande regulering. For å sikre nok gytefisk i elvane til hausten vert difor fisket redusert med 14 dagar.
Midtsesongsevaluering
I vassdraga Nærøydalselva, Daleelva (Høyanger), Mørkridselva, Lærdalselva, Sogndalselva, Årøyelva, Vikja, Nausta og Osenelva har lokal forvaltning avtale med Fylkesmannen om førehandsavtala tiltak, som skal setjast i verk om midtsesongsevalueringa tilseier at gytebestandsmålet ikkje vert nådd. Desse vassdraga er difor ikkje omfatta av forskrift om ekstraordinære reguleringstiltak i elv i 2019.
Viser midtsesongsevalueringa at det er mindre enn 50 % sjanse for å nå gytebestandsmålet, skal beskatningen opphøre for å bringe gytebestanden så nær gytebestandsmålet som mulig, jf. handlingsalternativ fire i retningslinene for førehandsavtalte tiltak. Fylkesmannen fylgjer opp midtsesongsevalueringane.