Landsomfattande kontroll av avfallshandtering
Statsforvaltaren gjennomfører i haust kontrollar for å sjå om kommunar og verksemder følgjer dei nye krava til utsortering og handtering av avfall.
Den landsomfattande tilsynsaksjonen er leia av Miljødirektoratet og skal kontrollere om kommunar og verksemder følgjer dei nye krava i avfallsforskrifta (kapittel 10a). Sidan 1. januar 2023 har det vore krav om utsortering av mat-, park- og hageavfall samt plast. Frå 1. januar 2025 omfatta krava òg papp-, papir-, glas- og metallemballasje samt tekstilar.
Kommunar har ansvar for innsamling av hushaldningsavfall
Kommunane har ansvar for å samle inn hushaldningsavfall og sørgje for at ordningane legg til rette for utsortering av mat-, park- og hageavfall, plast, papp, papir, glas, metallemballasje og tekstilar. Tilsyna vil undersøkje korleis kommunane oppfyller dette ansvaret, og om avfallet blir sendt vidare til ombruk eller materialgjenvinning.
Verksemder skal ha eigne ordningar for avfallshandtering
Tilsynsaksjonen vil òg retta seg mot verksemder, som skal ha eigne ordningar for avfallshandtering. Desse må kunne vise at dei har tilfredsstillande system for utsortering og levering av avfall i samsvar med regelverket. Tilsyna vert i hovudsak gjennomført uvarsla.
Vidare oppfølging
Målet er å samle erfaringar frå både kommunar og verksemder til vidare oppfølging, og å sikre at ressursane i avfallet blir tekne vare på gjennom ombruk og gjenvinning. Rettleiingar om regelverket er oppdaterte og tilgjengelege på nettsidene til Miljødirektoratet.