Andre årsrapport frå overvakingsprogrammet i Hardangerfjorden er klar
Ferske målingar frå 2025 viser at Hardangerfjorden generelt er i god miljømessig stand, men det er store lokale forskjellar – spesielt når det kjem til oksygen i djupet.
Rapporten frå det andre året av «Overvåkingsprogram for Hardangerfjorden 2024-2026» er no klar. Målet med programmet er å få betre oversikt over tilstanden i utvalde vassførekomstar i Hardangerfjorden og å gje eit bilete av den samla belastinga på fjordsystemet. Programmet skal supplere anna overvaking i fjordsystemet og ei samla vurdering vil bli presentert i samlerapporten som kjem neste år. Prøvetakinga i år to og tre består av plankteplankton, næringssalt, siktedjup og oksygen ved botn i seks vassførekomstar; Eidfjorden, Sildafjorden, Husnesfjorden, Bjoafjorden, Etnefjorden og Bømlafjorden (Figur 1). Vi gir her ei kort oppsummering av status etter to år med prøvetaking.
Oppsummering
Isolert sett viser målingane i Hardangerfjorden relativt stabile forhald i 2024 og 2025.
Betring i sikt og stabile næringsnivå
Siktedjupet i fjorden er generelt veldig bra. Dei fleste stasjonane har «svært god» tilstand, og i Bømlafjorden og Husnesfjorden har sikta forbetra seg sidan 2024. Unntaket er Etnefjorden, som vert vurdert til «moderat».
Når det gjeld næringssalt, er måleverdiane låge og tilstanden «svært god» i nesten heile fjordsystemet. I Etnefjorden har ein sett ei positiv utvikling frå «god» til «svært god» det siste året.
God tilstand for planktonalgar
Tilstanden for planteplankton (klorofyll a) i fjorden er generelt vurdert som «svært god» i område som Eidfjorden, Sildafjorden og Husnesfjorden. I Bømlafjorden og Bjoafjorden er tilstanden vurdert som «god». Det er ein tilstandsklasse dårlegare enn målingane i 2024 (Fig. 4-1).
Oksygenutfordringar i djupe terskelfjordar
Når det gjeld oksygen i botnvatnet, ser vi ein tydeleg gradient frå kysten og innover. Tilstanden i dei ytre områda er svært god, medan tilstanden lengre inn er dårlegare. I Eidfjorden er tilstanden moderat, og i Etnefjorden er tilstanden dårleg. I Samlafjorden, mellom Hissfjorden og Eidfjorden, finn ein det djupaste punktet i Hardangerfjorden på 855 meter. Oksygennivå her blir overvaka gjennom det statlege overvakingsprogrammet «ØkoKyst». Data frå «Økokyst» frå 2025 er ikkje klar i skrivande stund. Desse vil inkluderast i ei samla tilstandsvurdering av fjordsystemet i neste års samlerapport for overvakingsprogrammet i Hardangerfjorden.
Overvakinga vår i 2025 viser til et innsig av friskt oksygenrikt vatn i fjordsystemet i perioden april – september som ein kan sjå igjen som auka oksygeninnhald i fjordjupet utover hausten.
Overvakingsprogrammet i Hardangerfjorden er del av oversikten over miljøtilstanden i kystvatn i Vestland
Undersøkingane i Hardangerfjorden er ein del av eit større nettverk av overvakingsprogram i Vestland som skal gi ei samanhengande og omfattande oversikt over den økologiske og kjemiske tilstanden i kystvassførekomstane. Meir informasjon om dette arbeidet, og alle rapportane, finn du i nettsaka vår om overvaking av miljøtilhøva i kystvatn.