Midlar til regionale klima- og miljøtiltak

Statsforvaltaren forvaltar midlane i klima- og miljøprogrammet (KMP) som går til fylkesvise tiltak. Ramma for 2026 er på 1 000 000 kroner. Utfylling av søknad skal gjerast i Altinn.

Formålet med tilskotsordninga

Klima- og miljøprogrammet skal bidra til å nå klima- og miljømåla i landbrukspolitikken.

Prosjekta som får støtte skal medverke til oppdatert kunnskap for rådgjeving og forvaltning, at eksisterande eller ny kunnskap når raskt når ut til næringsutøvarar og informasjon om miljøarbeidet i jordbruket.

Programmet har fem kategoriar; klimatilpassing, klimagassutslepp, jord og jordhelse, naturmangfald og kulturverdiar i kulturlandskapet og forureining til vatn, jord og luft.

Prosjekt som får støtte frå programmet skal medverke til å nå følgjande mål:

• produksjon av mat skal gå føre seg med god ressursbruk og minst mogleg forureining, klimagassutslepp og tap av naturmangfald.
  
  
• å auke miljøbidraget frå landbruket, som kulturlandskap, naturmangfald, binding av karbon og produksjon av biogass.
  
  
• å tilpasse agronomi og dyrkingssystem til endra klimaforhold, med sikte på å oppretthalde eller auke matproduksjonen og vareta produksjonsressursane.

Kven kan søkje?

Føretak som arbeider med kunnskapsutvikling eller kunnskapsformidling kan søkje støtte frå programmet. Døme på aktuelle søkjarar er:

• Utgreiings- og forskingsverksemder (institusjonar)
• Fag- eller næringsorganisasjonar
• Kommunar og andre føretak

For å kunne søkje, må føretaket vere registrert i Einingsregisteret.

Prioriteringar i 2026

Prosjekt som bidrar med kunnskap om praktisk oppfølging og tilpassing til gjødselbruksforskrifta og vassforskrifta, og aukar kunnskap om og praktisk tilpassing til klimautfordringane (utslepp og klimatilpassing), vil bli prioriterte i 2026.

For utfyllande informasjon om klima- og miljømidlane, sjå retningslinjene i høgre marg.

Søknadsfristen er 15. mars.