48 millionar til tørkeramma bønder

I Sogn og Fjordane og Hordaland var det totalt 341 og 316 søknader om avlingssvikt på gras, frukt og bær. Normalt er det under 20 søknader i kvart fylke. Utbetalinga for 2018 er omtrent lik i kvart fylke og søkjarane har i snitt fått utbetalt 80 000 kroner.

Erstatninga for grovfôr vart auka dette året då kostnaden med å kjøpe grovfôr var særleg høge. Dette skuldast tørke og avlingstap i heile Sør-Norge som medførte lengre transport og auka prispress på grovfôr.

Året 2018

Våren og sommaren 2018 var uvanleg varm og med lite eller ingen nedbør. Dette gjorde at avlinga tørka bort. Førsteslåtten vart sterkt redusert, og for enkelte vart det lite eller inga avling. Særleg hardt råka vart bønder med mykje attlegg og bønder som brukte innmarka som beite om våren.

Gras og grovfôr

Bønder som var tidleg ute med gjødsla og tok ein tidleg førsteslått fekk dei beste avlingane. Dei fekk regn på gjødsla om våren og hausta graset før det tørka bort. På andreslåtten fekk mange ei normal eller god avling, men her var det store variasjonar. Mange gjødsla ekstra for å få ein tredjeslått på hausten. Dei som var tidleg med første- og andreslåtten fekk hausta tredjeslåtten første veka i september. Etter dette vart det samanhengande regn og store nedbørsmengder utover heile hausten. Dette gav vanskelege hausteforhold og dårleg graskvalitet for dei som var seine med slå andreslåtten.

Frukt og bær

Det er også gitt erstatning etter avlingssvikt i frukt og bær. Nok av dette skuldast for lite vatning i det varme været. Men erstatningane er primært knytt til ei haglbyge som skada frukta i Hardanger og frostskade på bringebær om våren i Sogn og Nordfjord. Totalt var det 27 søknader i Sogn og Fjordane og 13 saker i Hordaland.

Tabell 1: Kommunane i Hordaland

Tabell 2: Kommunane i Sogn og Fjordane