Tydeleggjer oppgåvene til kommuneoverlegefunksjonen
Den nye rettleiaren har mål om å styrke arbeidet med folkehelse og beredskap. Helsedirektoratet arrangerer webinar om rettleiaren 4. juni, som vi oppmodar kommunane om å få med seg.
Kommuneoverlegen er den medisinskfaglege rådgjevaren i kommunane. Fleire, mellom anna Koronakommisjonen, meiner at måten kommunane nyttar rolla på, gjer at rolla blir utydeleg og for ulikt praktisert. Erfaringane frå pandemien viser også at rolla var sårbar for overbelastning i krise.
I rettleiaren får kommuneleiinga råd om korleis dei kan planlegge og organisere kommuneoverlegefunksjonen slik at kapasitet og samfunnsmedisinsk kompetanse vert nytta best mogleg. Med rettleiaren ønskjer myndigheitene å klargjere og avgrense oppgåvene til kommuneoverlegen for å sikre at kunnskapen til kommuneoverlegen blir brukt til det beste for kommunane og befolkninga.
Rettleiaren finn du på heimesida til Helsedirektoratet: Kommunens organisering av kommuneoverlegefunksjonen og samfunnsmedisinsk arbeid i kommunen - Helsedirektoratet
Helsedirektoratet arrangerer webinar om den nye rettleiaren 4. juni. Du finn meir informasjon og moglegheit for påmelding på nettstaden til Helsedirektoratet.