Fagnettverk for tenester til personar med utviklingshemming
Utviklingssentera for sjukeheim og heimetenester (USHT) i Sogn og Fjordane og Hordaland inviterer til deltaking i CRPD-nettverket, eit fagnettverk for tilsette i kommunale tenester til personar med utviklingshemming.
Dette innhaldet er meir enn eitt år gammalt. Informasjonen kan derfor vere utdatert.
CRPD står for «Convention on the Rights of Persons with Disabilities», FN-konvensjonen om rettar til menneske med nedsett funksjonsevne.
Første samling i nettverket er 14.-15. september i Bergen, og påmeldingsfristen er 16. august.
Betre levekåra for personar med utviklingshemming
Nettverket er organisert som eit prosjekt over to år med åtte samlingar, og i prosjektgruppa er det representantar frå Senter for omsorgsforskning, Vest (SOFV), Nasjonalt kompetansemiljø om utviklingshemming (NAKU), Høgskulen på Vestlandet (HVL), Norsk forbund for utviklingshemmede (NFU), Statsforvaltaren i Vestland og Kommunesektorens organisasjon (KS).
Nettverket si overordna målsetting er å betre levekåra for personar med utviklingshemming gjennom å styrke fag- og tenesteutviklinga, i tillegg til kompetanseheving hos tilsette som yter tenestene.
Deltakarane vil mellom anna få inngåande kjennskap til relevante rettleiarar, konvensjonar og faglege anbefalingar, og praktisk bruk av desse, rettleiing i innføring av nye tiltak lokalt, erfaringsdeling med fagpersonar i andre kommunar og tilgang til fagmiljø som deltek i prosjektgruppa. Målgruppa er fagpersonar som har ein fagleg rolle i tenestene, til dømes fagkoordinatorar, fagrådgjevarar, fagleiarar og einingsleiarar.