Tilskot som skal bidra til språkutvikling til minoritetsspråklege barn i barnehage
Kommunar, som oppfyller kriterium for ordninga, får tilskot for å styrke språkutviklinga til minoritetsspråklege barn i barnehagane. Målet med ordninga er å støtte barna i å bruke morsmålet sitt og samtidig utvikle norsk språkkompetanse – som er ein nøkkel for meistring og inkludering i kvardagen.
Om tilskotsordninga
Tilskotet skal bidra til at kommunane iverkset tiltak som fremjar språkutviklinga til minoritetsspråklege barn i barnehagen.
Tilskot kan òg gjevast til døve eller sterkt høyrselshemma barn viss barnehagen har tilsett ein tospråkleg assistent som meistrar teiknspråk. Barnehagar som har slik kompetanse blir oppmoda til å ta kontakt med kommunen sin om moglegheit for tilskot.
Kven er minoritetsspråklege barn?
Minoritetsspråklege barn er for denne ordninga definert som barn med ein annan språkbakgrunn enn norsk, med unntak av barn som har samisk, svensk, dansk eller engelsk som morsmål. Begge føresette til barnet må og ha eit anna morsmål enn norsk, samisk, svensk, dansk eller engelsk.
Grunnlaget for tilskotet – innrapportering i BASIL
Tilskotet blir berekna ut frå tal barn i ordinær barnehagar som blir innrapportert i årsmelding for barnehagar per 15. desember året før tilskotsåret (BASIL).
Kriterium for tilskot
For å ha rett til tilskot må kommunen oppfylle begge kriteria:
- Minst 10 prosent av barna i barnehage må vere minoritetsspråklege.
- Det må vere 50 eller fleire minoritetsspråklege barn i barnehage.
Barn i både kommunale og private ordinære barnehagar blir tekne med i berekninga.
Kommunen skal
- Sørge for at alle ordinære barnehagar (både private og kommunale) kjenner til ordninga og at tilskotet blir berekna ut frå rapporteringa i årsmeldingsskjema.
- Disponere og fordele tilskotet slik at barnehagane kan iverksette tiltak som styrker språkutviklinga til minoritetsspråklege barn.