Opprydding etter Miljøservice Eide
Statsforvaltaren i Møre og Romsdal lyser ut anbod for å rydde opp på eigedomane etter den tidlegare bedrifta Miljøservice Eide AS på Eide i Hustadvika kommune.
På den nordre delen av Torvvegen 28 skal det avfallet som ligg att på dei sørlege delane av eigedomane, samlast og dekkast til.
Dette skal gjerast
Det skal vere ei overflate over avfallet som hindrar at nedbør kan trenge inn avfallsmassane og gje forureiningar i sigevatnet. Sjølve dekket skal ha membran og avfallsfrie massar på toppen.
Bekkar på sidene av avfallsområdet skal også bli sikra mot forureining. Det skal bli laga eit oksidasjonsvindauge for å bryte ned metangass.
Vesentleg redusert fare for forureining og moglegheit for næring
– Etter at tiltaka er gjennomførte, vil faren for forureining frå området bli vesentleg redusert, seier underdirektør Christian Dahl, hos Statsforvaltaren i Møre og Romsdal.
Han fortel at det tildekka området til slutt vil få vegetasjon, ved ei eigna frøblanding.
– Når arbeidet er utført, vil store delar av eigedomane kunne nyttast til næringsføremål, og ein vil få god kontroll med eventuell restforureining frå området, seier Dahl.
Anbodet ligg på Doffin: https://doffin.no/notices/2025-112371