Nye midlar til drenering, miljøtiltak og tilrettelegging for beite
Statsforvaltaren har fordelt over 21 millionar kroner i kommunale rammer til tre sentrale landbruksordningar. No startar kommunane utlysinga av midlar til drenering, miljøtiltak og tilrettelegging for utmarksbeite i Møre og Romsdal.
Dei tre ordningane er tilskot til drenering av jordbruksjord, spesielle miljøtiltak i jordbruket (SMIL) og tiltak i beiteområde. Tilskota er viktige verkemiddel for å ta vare på kulturlandskapet og sikre eit berekraftig og produktivt landbruk i fylket.
Drenering gir betre jord – og mindre avrenning
I år er det fordelt 9,3 millionar kroner til drenering av jordbruksjord. Målet med ordninga er å forbetre kvaliteten på tidlegare grøfta jord og auke potensialet for matproduksjon. Samstundes skal risikoen for erosjon og avrenning til vassdrag bli redusert. Både eigarar, leigetakarar og grunneigarar som leiger ut areal, kan søkje om tilskot.
Miljøtiltak i landbruket
For ordninga Spesielle miljøtiltak i jordbruket (SMIL) er det fordelt 9,5 millionar kroner. Midlane skal gå til tiltak som fremjar natur- og kulturminneverdiane i kulturlandskapet og som reduserer forureining frå landbruket. Eigarar og leigetakarar av landbrukseigedomar kan søkje, så lenge det blir driven tilskotsberettiga produksjon på eigendomen. Både privatpersonar og føretak kan vere søkjarar.
Tiltak for betre beitebruk i utmark
Det er òg fordelt 2,65 millionar kroner til tiltak i beiteområde. Ordninga skal leggje til rette for best mogleg utnytting av utmarksbeite, redusere tap av beitedyr og styrkje felles løysingar i beiteområda i utmark. Lag, foreiningar og føretak som driv næringsmessig beitedrift i utmark kan søkje. Enkeltføretak kan søkje når naturgitte eller driftsmessige tilhøve gjer at det ikkje ligg til rette for samarbeid.
Har du planar om å gjennomføre tiltak? No er tida inne
No som årets rammer er fordelte, går kommunane i gang med å lyse ut midlar, behandle søknader og gjere prioriteringar. For bøndene gir dette nye moglegheiter til å setje i gang tiltak som kan styrkje både drifta, miljøet og beitebruken.
Kommunane har ansvar for heile søknadsprosessen – frå fastsetjing av fristar til rettleiing og behandling av søknader. Krava som gjeld varierer etter ordning og tiltakstype. For ordningane spesielle miljøtiltak i jordbruket og tiltak i beiteområde skal kommunane ha eigne retningslinjer for kva tiltakstypar som blir prioritert.
Informasjon om ordningane og retningslinjer blir publisert på kommunane sine nettsider. Bønder og andre som vurderer å søkje, blir oppmoda om å ta kontakt med kommunen sin for råd og rettleiing.