Fagsamling samfunnstryggleik og beredskap

Fylkesberedskapssjef Arve Meidell innleia samlinga, og orienterte om aktuelle tema og aktivitetar framover.

Tema for første dag var knytt til tilsyn, øvingar, heilskapleg arbeid med samfunnstryggleik og beredskap i kommunane, og kraftrasjonering. Lene Stavseng frå Fylkesmannen innleia om status i kommunane for arbeid med kommunal beredskapsplikt, og heilskapleg og systematisk arbeid med samfunnstryggleik og beredskap. Alfa Sefland Winge oppsummerte erfaringar frå Øving Lyneld, orienterte om digital sårbarheit og presenterte NATO-øvinga Trident Juncture 2018. Steinar Torsvik, ass. KDS (Kraftforsyningens distriktssjef) orienterte om kraftrasjonering.

På dag to var tema erfaringsdeling frå kommunalt samfunnstryggleiksarbeid, krisehandteringsmetodikk og Nødnett. Vivian Kjøpstad delte erfaringar med heilskapleg og systematisk arbeid innan samfunnstryggleik og beredskap i Osterøy kommune, med særskilt vekt på arbeidet deira med heilskapleg ROS-analyse. Snorre Halvorsen frå Bergen kommune gav ei innføring i proaktiv stabsmetodikk, og Knut Abrahamsen frå Direktoratet for samfunnstryggleik og beredskap informerte om Nødnett til nye brukargrupper.

Samlinga vart avslutta av fylkesberedskapssjef Arve Meidell som gav stafettpinnen vidare til Haavard Stensvand som blir fylkesberedskapssjef i Fylkesmannen i Vestland frå 1. januar 2019. Stensvand orienterte avslutningsvis mellom anna om samanslåingsprosessen og arbeid med samfunnstryggleik og beredskap i det nye embetet.

Program for samlinga ligg ved, artikkelen vil bli oppdatert med fleire presentasjonar.