Vi tilrår endra vern for Herdla naturreservat

Herdla naturreservat med kringliggjande fuglelivsfredingsområde blei oppretta i 1985. Herdla naturreservat ligg i Askøy og Alver kommunar. Løysinga som blei valt då var eit naturreservat som omfatta Herdlevalen til eit stykke ut i sjøen på nordsida, omslutta av eit større fuglelivsfredingsområde. Etter om lag førti år som verneområde er situasjonen endra på fleire område, og det er behov for å revidere både vernekartet og verneforskrifta. 

Vi tilrår ei utviding av verneområdet, og vi ønskjer også at området som i dag er fuglefredingsområde blir inkludert i naturreservatet. Vi tilrår også å endre verneforskrifta.

Herdla er eit av dei viktigaste leveområda for fugl i fylket

Herdla naturreservat er verna først og fremst på grunn av den viktige funksjonen området har for fuglelivet. Herdla og dei grunne sjøområda utanfor er eit av dei aller viktigaste områda for fuglelivet i Vestland fylke.

Storparten av Herdla er bygd opp av enorme mengder lausmassar frå siste istid.  
Dette legg grunnlag for eit rikt og variert fugleliv, og mange trua og sårbare fugleartar bruker området. Området er viktig både som hekkelokalitet, rasteområde i trekktida og som overvintringsområde. 

Bruken av Herdla har endra seg, då må vernet følgje etter

Bruken av området har endra seg mykje sidan området blei verna, og det er no svært mange ulike brukargrupper på Herdla. Dette gjer at dei viktigaste utfordringane i naturreservatet no kjem av forstyrring som følgje av ferdsle og aktiv bruk av området. Særleg gjeld dette forstyrring av fuglelivet frå ferdsle på vatnet, ferdsle utanfor vegar og stiar som går gjennom området, og frå hundar, særleg hundar som går med lange liner og hundar som går utan band. Vi tilrår derfor fleire endringar av reglane som gjeld for ferdsle i reservatet. 

Samstundes vil vi at reglar for aktivitetar som ikkje er aktuelle lenger skal takast ut av forskrifta.

Heile tilrådinga med oversendingsbrev, tilrådingsnotat og forslag til kart verneforskrift ligg til høgre i denne nettsaka.

Her finn du og besøkstrategien som skildrar mange av dei utfordringane som er nevnt over, og vårt høringsnotat, som skildrar det forslaget vi la ut til høring.