Kartlegging av naturmangfald i grunne område i Sognefjorden
Utvalde grunne område i indre del av Sognefjorden blir kartlagt for viktig marint naturmangfald i haust. Kartlegginga er ledd i arbeidet med marint vern.
Miljødirektoratet hadde tilgjengelege midlar att på slutten av året til kartleggingsarbeid, og med korte tidsfristar fekk vi ei løyving på kr 250 000,-. Desse midlane vil vi nytte til å kartlegge grunne sjøområde i samband med marin verneplan for Sognefjorden.
Firmaet Rådgivende Biologer vann anbodet, og skal i løpet av hausten ut i felt for å utføre kartleggingsarbeidet. Sju område er valt ut innanfor kostnadsramma. Områda ligg alle i indre del av Sognefjorden der det er behov for ny kunnskap.
Kor vil kartlegginga av grunne område føregå?
Områda er prioritert ut i frå eksisterande kunnskap og nærleik til kvarandre for å få mest mogeleg effektiv bruk av midlane. Vi har valt ut områda i samarbeid med Høgskulen på Vestlandet.
Disse sju områda skal vi kartlegge i haust:
- Terskel mellom Bakka og ytre Nærøyfjord
- Esefjorden
- Området Hagelin til Loftesnesbrua og terskelen til Barsnesfjorden
- Terskel ved Fimreite – Norane
- Amlabukti
- Årøy elvedelta
- Otternes- og Fretheimsgrunna ved Flåm
Korleis kartlegge grunne område i fjorden?
Kartlegginga vil bli utført av Rådgivende Biologer ved hjelp av eit drop-kamera som logger djupne, posisjon, dato og tidspunkt med video og bilete. Kameraet har kapasitet til å gå ned til 70-80 m djupne. Ein person vil handsame kabelen til drop-kamera, mens ein person noterer observasjonar og styrer videoopptak og bilettaking.
Kartleggarane vil nytte innleigd båt med båtførar for å kunne rekke over store område på kortast mogeleg tid. I tillegg til å køyre transekt med drop-kamera, vil kartleggarane også synfare område frå land. I område som er for grunne eller vanskeleg tilgjengeleg med båt, vil ein person gå langs strandlinja eller fridykke.
Endeleg rapport frå Rådgivende Biologer vil bli publisert på våre heimesider i løpet av mars 2023.
