Oppsummerande rapport etter tre år med overvaking i Måløyområdet: god vasskvalitet, men Skavøypollen slit

Figur 1: Oversikt over vassførekomstar i overvakingsprogrammet

Etter tre år med omfattande undersøkingar av sjøområda rundt Måløy ligg hovudtrekka no føre. Sjølve vassmassane er i hovudsak reine og friske, men i Skavøypollen sørgjer blant anna dårleg vassutskifting for kritiske forhold på botnen.

Publisert 26.02.2026

God vassutskifting i dei fleste områda

Dei store linjene viser at dei fleste undersøkte områda, som Ulvesundet og Vågsfjorden, har god vassutskifting. Dette gjer at oksygenforholda i ved botnen stort sett er gode og stabile gjennom mesteparten av året.

Når det gjeld næringssalt og algevekst (klorofyll), er tilstanden generelt god i heile regionen. Det er observert låge nivå av næringssalt, noko som tyder på liten grad av menneskeskapt overgjødning. Algeveksten følgjer ein naturleg rytme med ei tydeleg oppbløming i mars kvart år, men er elles låg.

Bilete av dei ulike tilstandsklassande for vassførekomster — Figur 2: Skjematisk oversikt over tilstandsklassifisering. Henta frå klassifiseringsrettleiaren. I samsvar med vassforskrifta skal alle vassførekomstar få fastsett ein økologisk og kjemisk tilstand, og miljømålet for alle norske vassførekomstar er at det skal oppnåast minimum «God» økologisk og kjemisk tilstand innan 2027, og at tilstanden ikkje skal ringast.

Skavøypollen: Ein naturleg flaskehals

Eitt område skil seg negativt ut i undersøkinga. I Skavøypollen er det to grunne tersklar i opninga ut mot Vågsfjorden som fører til avgrensa vassutskifting. Dette har lokalt store konsekvensar for vassmiljøet: Som følgje av svært dårlege oksygennivå ved botn gjennom store delar av året er tilstanden for dyrelivet på botnen (blautbotnfaunaen) vurdert som svært dårleg.

Kart som viser prøvetakingspunkter i overvakinga — Figur 2: Oversikt over prøvetaking i overvakingsprogrammet

Miljøgifter i botnen er ei felles utfordring

Sjølv om tilstanden i dei store vassmassane er gode, fortel sedimenta på botnen i alle dei undersøkte områda ei anna historie. Det er funne forhøgde nivå av ulike miljøgifter, noko som kan koplast til industri og skipsfart.

Det er særleg snakk om sambanda PAH, PCB7 og TBT, i tillegg til enkelte tungmetall som kopar og sink. Det forbode stoffet TBT er fleire stader klassifiserte som svært dårleg.

Ein del av oversikten over miljøtilstanden i kystvatn i Vestland

Undersøkingane i Måløy er ein del av eit større nettverk av overvakingsprogram i Vestland som skal gi ei samanhengande og omfattande oversikt over den økologiske og kjemiske tilstanden i kystvassførekomstane. Meir informasjon om dette arbeidet, og alle rapportane, finn du i nettsaka vår om overvaking av miljøtilhøva i kystvatn.