Arbeidsmiljøet til barna blir ikkje sikra gjennom kommunane sine tilsyn

Fjorårets landsomfattande tilsyn avdekte lovbrot i 42 av dei 51 kommunane der det vart gjennomført tilsyn.

I Vestland undersøkte vi kommunane Askøy, Osterøy, Aurland, Flora, Fitjar og Kvam i 2019. Tilsyna med Aurland, Fitjar og Kvam er endå ikkje avslutta.  

Les meir om resultata frå våre tilsyn i denne saka.

Bidra til læring og forbetring

Det blei gjennomført tilsyn i 51 kommunar over heile landet, og konstatert lovbrot i 42 av desse. I tilsyna har fylkesmennene undersøkt om kommunane utfører tilsynsarbeidet i tråd med krav i folkehelselova, slik at dårleg inneklima og andre miljømessige forhold som er ulovlege blir retta, heiter det i oppsummeringsrapporten frå Statens helsetilsyn.

Rapporten kan bidra til læring og forbetring av tilsynet med barnas «arbeidsmiljø». Kommunane bør bruke erfaringane frå enkeltrapportane og oppsummeringsrapporten til å gjennomgå eigen praksis. Eit særleg ansvar for dette ligg i kommuneleiinga.

Fylkesmannen fører tilsyn med kommunane sitt tilsyn

Eigarar og leiarar av barnehagar og skular har ansvar for inne- og utemiljøet til barna. Tilsynsansvaret til kommunane omfattar alle barnehagar og skular som ligg i kommunen. Fylkesmennene har undersøkt om kommunane tok vare på tilsynsansvaret.

Frå rapporten kjem det fram at lovbrota som vart funne i tilsyna gjaldt

• at kommunen ikkje sikrar at det blir gjennomført tilsyn
• at tilsyn ikkje blir gjennomført regelmessig
• at tilsyn ikkje var tilstrekkeleg basert på kunnskap om risiko
• at kommunen ikkje hadde styringsaktivitetar for å følgje med på tilsynsarbeidet
• oppgåvene blei teke vare på i tråd med krav i lov og forskrift

Det landsomfattande tilsynet viser at denne tilsynsordninga ikkje fungerer som tenkt, og ikkje godt nok.