Bustadsosialt arbeid hjå Statsforvaltaren
Kommunaldepartementet har avgjort at forsøket med å leggja bustadsosialt arbeid til statsforvaltarane, skal avsluttast frå 1. september, og at arbeidsoppgåver og tilsette skal førast tilbake til Husbanken.
Hovudgrunnen til avgjerda er ei ny og større satsing på Husbanken framover, frå regjeringa. Departementet strekar under at forsøket har vore vellukka, men at dei likevel har valt å gå i ei anna retning for å styrka heile Husbanken og det bustadsosiale feltet framover.
Me er leie oss for dette, ettersom me meiner me har kome eit godt stykke på veg i å utvikla samhandlinga med ulike fagområde. No er det viktig å ta vare på denne samhandlinga sjølv om nokre av arbeidsoppgåvene går tilbake til Husbanken. Me skal gjera vårt for at embetet og Husbanken skal arbeida tett og godt saman framover.