Opphevar løyve til å opprette nausttomt på Sæbø
Statsforvaltaren har i eit nytt vedtak avgjort at naustsaka på Sæbø må behandlast på nytt i kommunen.
Ørsta kommune innvilga våren 2025 ein søknad om å opprette ei nausttomt like nord for Sæbø sentrum. Vedtaket blei klaga på og Statsforvaltaren har no oppheva kommunes løyve.
Fritidsbustad, ikkje naust
Ved vurderinga av søknaden skal forvaltninga leggje til grunn kva den nye eigedomen objektivt sett kan brukast til.
– I denne saka er bygget innreidd for opphald og rekreasjon, og det er ikkje plass til oppbevaring av båt eller fiskereiskap. Bygningen framstår etter vår vurdering som ein fritidsbustad, ikkje som eit naust, seier rådgivar Mathea Gjeitnes hjå Statsforvaltaren i Møre og Romsdal.
Den nye nausttomta treng dispensasjon frå kommunens arealplan, samt byggeforbodet i strandsona. Kommunen har innvilga slik dispensasjon, men til bruk som nausttomt.
– Terskelen for å gje dispensasjon til hyttetomt i strandsona er strengare enn for nausttomt. Det at kommunen har vurdert saka som oppretting av ei nausttomt er ein feil som kan ha påverka innhaldet i vedtaket, seier Gjeitnes.
Returnerer saka til kommunen
Saka blir difor returnert til kommunen for ny saksbehandling.
– Slik saka står no må kommunen behandle saka som ein søknad om frådeling av ei hyttetomt. Dersom søknaden faktisk gjeld oppretting av ei nausttomt, føreset det klare haldepunkt for bygningen blir tilbakeført som eit naust. Dette er forhold kommunen må ta stilling til lokalt før Statsforvaltaren eventuelt får saka tilsendt på nytt, avsluttar Gjeitnes.