Søknad til klima- og miljøprogrammet 2022

Statsforvaltaren forvaltar midlane som går til fylkesvise tiltak. Ramma for 2022 er på 650 000 kroner. Utfylling av søknad skal gjerast i Altinn.

Formålet med tilskotsordninga

Klima- og miljøprogrammet skal bidra til å nå landbrukspolitikken sine mål innan klima og miljø.

Prosjekta skal medverke til at eksisterande eller ny kunnskap raskt når ut til næringsutøvarar, oppdatert kunnskap for rådgjeving og forvaltning, og å informere om jordbruket sin miljøinnsats til samfunnet elles.

Programmet omhandlar dei fem kategoriane klimatilpassing, klimagassutslepp, jord, naturmangfald/kulturverdiar i kulturlandskapet og forureining til vatn, jord og luft. Prosjekt som er med på å styrke kunnskapsgrunnlaget om klimautfordringar vert prioriterte, og særleg prosjekt som rettar seg mot klimavennleg driftspraksis.

Prosjekt som får støtte frå programmet skal medverke til å nå følgjande mål:

• At produksjon av mat skal gå føre seg med god ressursbruk og minst mogleg forureining, klimagassutslepp og tap av naturmangfald
• Å auke miljøbidraget frå landbruket, som kulturlandskap, naturmangfald, binding av karbon og produksjon av biogass
• Å tilpasse agronomi og dyrkingssystem til endra klimaforhold, med sikte på å oppretthalde eller auke matproduksjonen og vareta produksjonsressursane

Kven kan søkje?

Føretak som arbeider med kunnskapsutvikling eller kunnskapsformidling kan søkje støtte frå programmet. Døme på aktuelle søkjarar er:

• Utgreiings- og forskingsverksemder (institusjonar)
• Fag- eller næringsorganisasjonar
• Kommunar og andre føretak

For å kunne søkje, må føretaket vere registrert i Einingsregisteret.

Prioriteringar i 2022

I 2022 vil prosjekt som medverkar til å styrke kunnskapsgrunnlaget knytt til klimautfordringar i jordbruket og som dreier seg om klimavennleg driftspraksis bli prioriterte.
Aktuelle faglege tema kan til dømes vere:

Klimatilpassing

• Gjødsling, jordpakking, hausting, etablering av driftsvegar, dyre- og plantemateriale til endra klimatilhøve, dekkesystem for frukt og bær
• Førebygging av skade på jord og avling; hydroteknikk, hausteutstyr, driftsopplegg

Klimagassutslepp

• Redusere utslepp av metan frå husdyr og husdyrgjødsel, lystgass frå jord og CO2 frå nedbryting av karbon i jord og frå fossile energikjelder i gardsdrifta
• Samanheng mellom reduserte utslepp, god agronomi og økonomi

Jord

• Prosjekt som fører til auka kunnskap om karbonbinding
• Samanheng mellom jordkvalitet/jordhelse, jordfunksjonar og økosystemtenester
• Ulike planteartar og plantemangfald sin verknad på jordbiologi, jordhelse og karbonbinding over tid
• Jordhelsetiltak for enkeltproduksjonar

Naturmangfald og kulturminne i kulturlandskapet

• Styrking og synleggjering av kulturlandskap og biologisk mangfald i kombinasjon med vanlig jordbruksdrift
• God praksis for istandsetting og skjøtsel av kulturminne og verdifulle naturtypar, verneområde og prioriterte artar
• Informasjon om landbruket sitt bidrag til naturmangfald, kulturlandskap og varetaking av kulturminne

Forureining til vatn, jord og luft

• Prosjekt innan temaa gjødsling, lagring og handtering av husdyrgjødsel og biorest, jordarbeiding, erosjon og arealavrenning, drenering og hydroteknikk, biogjødsel og kompost
• Tiltak for å redusere ammoniakkutslepp
• Tiltak som kan auke kunnskapen om barrierar og moglegheiter for auka oppslutnad i områder med utfordringar i vasskvalitet

Søknadsfristen er 1. april.