Kartleggingsprøvar for 3. trinn hausten 2025

Elevane skal gjennomføre obligatoriske kartleggingsprøvar i lesing og rekning.

Påmelding

Skuleadministrator melder på alle elevane på trinnet, anten direkte i PAS-prøvar eller gjennom det skuleadministrative systemet.

• Det er opent for påmelding i PAS – prøvar frå 2. september.
• Elevar som skal ha kartleggingsprøvar på samisk eller som bruker teiknspråk må meldast på i PAS - prøvar med riktig kode.
• Det er mogleg å melde opp elevar i heile gjennomføringsperioden.
• Elevar som skal ha fritak skal òg meldast på til prøva.

Utprøving av tilrettelagte prøvar

 I haust gjennomfører Utdanningsdirektoratet ei utprøving av digitale kartleggingsprøvar som er tilrettelagt for synshemma og blinde elevar. Skular som ønskjer å delta, kan ta kontakt på post@udir.no.  

Før gjennomføring

Før gjennomføringsperioden startar er det viktig å fordele oppgåvene mellom lærar, leiing og eventuelt administrativt personale. Ansvarlege lærarar må ha tilgang til PAS- prøvar og ein må ha oppdaterte maskinar og kapasitet i det lokale nettverket. Foreldra må få informasjon om at skulen skal gjennomføre prøvane, og ein må førebu elevane på kva som skal skje. 

Vi har lenka til Utdanningsdirektoratet si heimeside i høgremargen for meir informasjon om gjennomføringa av kartleggingsprøvane.

Brukarstøtte

Spørsmål om gjennomføringa skal rettast tenesteveg.

• Skuleleiar skal ta kontakt med sin skuleeigar
• Skuleeigar skal rette spørsmål til statsforvaltaren i sitt fylke
• Statsforvaltar skal ta kontakt med utdanningsdirektoratet