Tilskot til utvikling, etablering og tilpassing av kunnskapsbaserte lågterskeltilbod innan psykisk helse- og rusmiddelfeltet 2026

Målet er å styrke det kommunale tenestetilbodet til målgruppa ved å legge til rette for tidleg hjelp med låg terskel. Kommunane kan søke om tilskot til nye tiltak som treff målgruppa og føremålet med ordninga, men også kommunar som søker om vidareføring av tiltak.

Lågterskeltilbod er sentrale i både Opptrappingsplan for psykisk helse (2023-2033) og Førebyggings- og behandlingsreforma for rusfeltet (2024-2025).

Søknad om tilskot 2026

Midlane skal nyttast til å gjere kunnskapsbaserte og lågterskel tenestetilbod tilgjengeleg for målgruppa.

Med kunnskapsbasert meiner vi at innhald og metodikk i tenesta byggjer på eit samspel av kunnskap frå forsking, klinisk kunnskap og erfaring frå brukarar og pårørande. Kunnskapsbasert inneberer også at det kommunale handlingsrommet blir teke omsyn til ut frå lokale ressursar, rammer, føresetnader og erfaringar.

Kommunar som tidlegare har fått tilskot under prioritet 2 frå dei avvikla tilskotsordningane (sjå under) kan søke om vidareføring av tilskotet over denne ordninga, men tiltaket må vere tilpassa i tråd med nasjonal rettleiar psykisk helsearbeid barn og unge eller nasjonal rettleiar for lokalt psykisk helse- og rusarbeid for vaksne.

Vi oppmodar søkjarane til å lese regelverket nøye før de fyller ut søknadsskjemaet.

Søknadsskjema, regelverk og meir informasjon finn du på Helsedirektoratet si heimeside: Utvikling, etablering og tilpasning av kunnskapsbaserte lavterskeltilbud innen psykisk helse- og rusmiddelfeltet - Helsedirektoratet.

Søknad om tilskot skal de sende til sfvlpost@statsforvalteren.no.

Avvikla tilskotsordningar og rapportering på desse

To tilskot er avvikla frå 2026, og dei nye tilskota Utvikling, etablering og tilpassing av kunnskapsbaserte lågterskeltilbod innan psykisk helse- og rusmiddelfeltet og Etablering av ACT-, FACT- og FACT ung-team skal delvis erstatte dei avvikla tilskota.  

Kommunar som fekk tilskot i dei avvikla tilskotsordningane, skal rapportere på midlane dei fekk tildelt i 2025 innan 1. april 2026. De finn rapporteringsskjema og økonomirapportering på lenkjene for tilskot under. 

Avvikla tilskot:

• Oppfølging av barn og unge med psykiske helseutfordringar og rusmiddelrelaterte problem
• Oppfølging av vaksne med behov for langvarig oppfølging og samansette teneste

Rapporterings- og økonomiskjema sender de som vedlegg i e-post til sfvlpost@statsforvalteren.no.

Digitalt møte om tilskot 23. januar

Vi arrangerer eit digitalt møte om tilskotsordningane vi forvaltar på helse-, sosial- og barnevernsfeltet 23. januar. Meir informasjon og moglegheit for påmelding finn du på følgjande side: Digitalt møte om tilskot på helse-, sosial- og barnevernsfeltet | Statsforvaltaren i Vestland