Fråsegn til revisjon av statlege planretningslinjer for strandsona
Kommunane i Vestland fylke er som i gjeldande retningsliner plasserte i sone to og tre. Fylkesmannen har tidlegare peika på at kommunar med samanliknbart og stort byggjepress bør liggje i sone to. I fråsegna minner vi om det.
Dette innholdet er mer enn ett år gammelt. Informasjonen kan derfor være utdatert.
I fråsegna har Fylkesmannen merknader og råd om soneinndeling, planlegging, fastsetting av byggjegrense til sjø og om motsegn. Fråsegna er lagt ved under dokument i høgremargen.
Fylkesmannen har i ein tidlegare fase i revisjonsarbeidet av dei statlege planretningslinene skrive brev til Kommunal- og moderniseringsdepartementet om m.a. soneinndelinga. Vi har i brevet lagt vekt på kommunane i Sunnhordland, m.a. på grunn av byggjepresset der. Brevet er lagt ved under dokument.
Når det gjeld motsegn, seier utkastet til reviderte planretningsliner for strandsona at det kan fremjast motsegn dersom eit planforslag er i strid med nasjonale og vesentlege regionale interesser. Samtidig er det presisert at statlege og regionale styresmakter skal legge stor vekt på det lokale sjølvstyret i vurderinga av om det skal fremjast motsegn.
Fylkesmannen har i si fråsegn rådd i frå formuleringa om vektlegging av det lokale sjølvstyret ved vurderinga av om motsegn skal fremjast mot planforslag i strid med nasjonale og regionale interesser, då det er særs viktig at det ikkje oppstår tvil på dette punktet. I område med nasjonale og regionale interesser, som i strandsona, er det i praksis og i rettleiing om bruk av motsegn presisert at ivaretaking av strandsoneinteressene går føre det lokale sjølvstyret.