Sosialstønad til buutgifter
Statsforvaltaren i Vestland får ein del spørsmål om sosialstønad til buutgifter, både frå tilsette ved Nav og frå personar som søkjer Nav om hjelp. I tillegg er buutgifter ofte tema i klagesaker som vi behandlar.
Dette innholdet er mer enn ett år gammelt. Informasjonen kan derfor være utdatert.
Løpande utgifter til bustad ligg i kjerneområdet for livsopphaldet. Dette gjeld primært husleige, straum og innbuforsikring. Nav har plikt til å gi sosialstønad til å dekke slike utgifter, dersom ein ikkje har pengar til å dekke utgiftene sjølv, og dei andre kriteria for rett til sosialstønad er oppfylt.
Arbeids- og velferdsdirektoratet har fått i oppgåve å tolke sosialtenestelova, og deira tolkingar er samla i rundskriv 35. Buutgifter er omtalt under punkt 4.18.2.42 i rundskrivet. Omtalen er ikkje uttømmande, og vi har fått svar på nokre uavklarte spørsmål frå direktoratet.
I brev dagsett 2. mai 2018 svarte Arbeids- og velferdsdirektoratet på desse fire spørsmåla:
- Kan Nav sjå heilt bort frå husleiga dersom leigenivået er høgare enn eit rimeleg og nøkternt nivå, utan å gå vegen om å setje vilkår om å redusere buutgiftene?
- Har det i tilfelle betyding om sosialhjelpssøkjaren nett har flytta inn i husværet, sett i høve til om vedkomande har hatt denne husleiga over tid og klart å betale?
- Dersom Nav må gå vegen om å setje vilkår om at vedkomande må redusere buutgiftene, må då Nav rekne heile husleiga som utgift ved utmåling av sosialstønad i områings-perioden, eller kan Nav redusere stønad til husleige på eit rimeleg og nøkternt nivå?
- Vi legg til grunn at Nav kan redusere stønaden til husleige dersom ein sosialhjelpsmottakar ikkje oppfyller vilkår om å redusere buutgiftene, men kan Nav i eit slikt tilfelle avslå stønad til husleige heilt? Eller må Nav i eit slikt tilfelle gi stønad til husleige på eit rimeleg og nøkternt nivå, altså til ein del av husleiga?
Vi tek utgangspunkt i direktoratets lovtolkingar når vi svarar på spørsmål og når vi behandlar klagar.