Nytt rekrutteringsprogram gir nye moglegheiter

Eit nytt verkemiddel for kommunane

Helsedirektoratet og Nav samarbeider om ei ny tilskotsordning som skal støtte kommunane sitt arbeid med rekruttering til den kommunale helse- og omsorgstenesta. Ordninga er utvikla for å møte kommunane sine langsiktige behov for arbeidskraft, samstundes som fleire personar utanfor arbeid og utdanning får høve til å kome inn i arbeidslivet.

Gjennom rekrutteringsprogrammet vil kommunane kunne ta imot og følgje opp nye medarbeidarar som får støtte gjennom Nav, og som er motiverte for å prøve seg i arbeid.

Målgruppe og Nav si rolle

Målgruppa for programmet er personar utanfor arbeid og utdanning. Ordninga er primært retta mot unge i alderen 18–30 år, men òg personar over 30 år kan delta.

Nav lokalt har ansvar for å finne og følgje opp aktuelle kandidatar gjennom tiltaket Arbeid med støtte, i tett samarbeid med kommunen. Dette gir kommunane tilgang til kandidatar som får tilpassa oppfølging både før og under arbeidsforholdet.

Tilskot og vidare informasjon

Tilskotsramma for 2026 er på 64 millionar kroner, og planen er å lyse ut tilskotsordninga i løpet av januar. Detaljert informasjon om kva tilskotet kan brukast til, og korleis rekrutteringsprogrammet skal innrettast i kommunane, kjem i utlysinga på nettsidene til Helsedirektoratet.

Oppmoding til kommunane

Kommunane blir oppmoda til å gjere seg kjende med ordninga og vurdere korleis rekrutteringsprogrammet kan inngå i det lokale arbeidet med kompetanse- og tenesteutvikling.

Forankring

Rekrutteringsprogrammet er forankra i statsbudsjettet og i intensjonsavtalen mellom Arbeids- og inkluderingsdepartementet (AID), Kommunal- og distriktsdepartementet (KDD), Helse- og omsorgsdepartementet (HOD), KS og partane i arbeidslivet.