Utvikling, etablering og tilpassing av kunnskapsbaserte lågterskeltilbod innan psykisk helse- og rusmiddelfeltet

Eit av hovudmåla saman med fleire delmål er ei omlegging av eksisterande psykisk helse- og rustenester til meir lågterskelbaserte tilbod – i tråd med nasjonal rettleiar psykisk helsearbeid barn og unge eller nasjonal rettleiar for lokalt psykisk helse- og rusarbeid for vaksne.

Dei tiltaka som det blir innvilga tilskot til skal bidra til å nå målet for ordninga.

Tiltak som kan få tilskot

Midlane skal nyttast for å gjere eit kunnskapsbasert og lågterskel tenestetilbod tilgjengeleg for målgruppa. Kunnskapsbasert betyr at innhaldet og metodikken til tenesta bygger på eit samspel av kunnskap frå forsking, klinisk kunnskap og erfaring frå brukarar og pårørande. Kunnskapsbasert inneber også at det kommunale handlingsrommet blir teke i betraktning frå lokale ressursar, rammer, føresetnader og erfaringar.

Tenestetilbodet skal vere ei etablering eller omlegging, for eksempel ei psykisk helseteneste for barn og unge, som kjem i tillegg til ordinære helse- og omsorgstenester som helsestasjon, skulehelseteneste og fastlegeordninga. Det kan vere organisert ulike stader i kommunen, men skal vere eit eige tilbod innan psykisk helse og rusfeltet. Det skal gå tydeleg fram at tenesta gir helsehjelp og behandling utover det som blir gitt i dei ordinære tenestene.

Kommunar som tidlegare har fått støtte gjennom prioritet 2 frå dei tidlegare tilskotsordningane:

• Oppfølging av voksne med behov for langvarig oppfølging og sammensatte tjenester
• Oppfølging av barn og unge med psykiske helseutfordringer og rusmiddelrelaterte problemer

kan innvilgast tilskot over denne ordninga, men må då tilpasse tiltaket i tråd med nasjonal rettleiar psykisk helsearbeid barn og unge eller nasjonal rettleiar for lokalt psykisk helse- og rusarbeid for vaksne.

Det kan også innvilgast tilskot til lågterskeltilbod som kombinerer både psykisk helse- og rusarbeid. Kunnskapsbaserte lågterskeltilbod kan også vere digitale tilbod med rettleidd internettbehandling, og dessutan gruppetilbod.

Tiltaka skal baserast på nasjonal rettleiar psykisk helsearbeid barn og unge eller nasjonal rettleiar for lokalt psykisk helse- og rusarbeid for vaksne.

Kommunen kan velje å utvikle tiltak i eigen kommune, eller gjennom interkommunalt samarbeid.

Inngangsvilkår

Det er ein føresetnad for å kunne få tilskot at gradvis auka del av eigenfinansiering er beskriven i søknaden. Det er forventa at eigenfinansiering blir trappa opp samtidig som tilskotsmidlane blir reduserte. Eigenfinansieringa må vera forankra i leiinga i kommunen.

Informasjon, regelverk og søknadsskjema

Du finn meir informasjon om ordninga og regelverk på Helsedirektoratet si nettside  Utvikling, etablering og tilpasning av kunnskapsbaserte lavterskeltilbud innen psykisk helse- og rusmiddelfeltet.

Der finn du også søknadsskjema.

Søknaden skal sendast til Statsforvaltaren i Møre og Romsdal sitt postmottak: sfmrpost@statsforvalteren.no

Søknadsfrist: 1. april 2026