Utlysing av tilskot til regionalt Klima- og miljøprogram

Søknadsfristen er 1. september 2026.

Formål med tilskotsordninga

Klima- og miljøprogrammet skal bidra til å nå landbrukspolitikken sine mål innan klima og miljø. Prosjekta skal gje auka kunnskap om utfordringar og tiltak, effektive verkemiddel for næringa og god kunnskapsoverføring frå forsking til praktisk jordbruk, og dei skal bidra til oppdatert rådgjeving til næringa innan klimagassutslepp, klimatilpassing og vassmiljø.

Prosjekt som får støtte frå programmet skal medverke til å nå følgande mål:

• at produksjon av mat skal gå føre seg med god ressursbruk og minst mogleg forureining, klimagassutslepp og tap av biologisk mangfald
• å auke miljøbidraget frå landbruket, som kulturlandskap, biologisk mangfald knytt til kulturmark, binding av karbon og produksjon av biogass
• å tilpasse agronomi og dyrkingssystem til endra klimaforhold, med sikte på å oppretthalde eller auke matproduksjonen og ivareta produksjonsressursane

Tema som kjem inn under tilskotsordninga

• klimatilpassing
• klimagassutslipp
• jord og jordhelse
• naturmangfold/kulturminne i kulturlandskapet
• forureining til vatn, jord og luft

Kven kan søke?

Føretak som arbeider med kunnskapsutvikling eller kunnskapsformidling kan søke støtte frå programmet. Døme på aktuelle søkarar er:

• utgreiings- og forskingsverksemder (institusjonar)
• fag- eller næringsorganisasjonar mv.
• andre føretak

For å kunne søke må føretaket vere registrert i Einingsregisteret.

Søknad må vere loggført i Altinn med innlogging via ID-porten, innan 1. september 2026.

Prioriteringar for 2026

Vi prioriterer prosjekt som styrker klimavenleg driftspraksis og kunnskap om klimautfordringar i jordbruket. Statsforvaltaren vil i 2026 prioritere søknader med fokus på følgande område:

• tiltak for reduksjon i utslepp av klimagassar
• kunnskap om vassmiljø og presisjonsutstyr for redusert avrenning/optimalisering av gjødsling/sprøyting
• kunnskap kring ivaretaking/omsyn til naturmangfald og kulturminne

Søkar må også legge fram korleis dei planlegg å nå ut med resultatet, og gje faglege råd til næring/forvaltning.