Søknad om endring av løyve til anleggsarbeid med utslepp til sjø - Bue Salmon - landbasert matfiskanlegg - Lutelandet i Fjaler kommune

Prosjektet inneber oppføring av eit landbasert matfiskanlegg med ein planlagd kapasitet på 50 000 tonn laks årleg. Det skal fyllast ut massar i ei bukt sørvest i industriområdet for å utvide eksisterande areal. Vidare skal det drivast to tunnelar: ein inntakstunnel for sjøvatn og ein utløpstunnel for avløpsvatn som munnar ut i Korssundosen.

Bue Salmon søkjer no om endring av løyvet for følgjande forhold:

• Mudring: Fjerning av 3 000 m3 lausmassar i den vestlege delen av utfyllingsområdet for å sikre stabilitet. Supplerande miljøundersøkingar frå juni 2026 dokumenterer at desse massane er reine.
• Auka utfyllingsvolum: Totalt volum for utfylling i sjø vert søkt auka frå 300 000 m3 til inntil 350 000 m3.
• Endring av partikkelsperre: Det vert søkt om fritak frå bruk av siltgardin i fase 1 ved bruk av reine massar frå splittlekter. I fase 2 vert det søkt om å nytte boblegardin som barriere i staden for siltgardin, då lokale straumforhold gjer siltgardin teknisk uegna.

Offentleg ettersyn
Saksdokumenta finn du til høgre på denne nettsida.

Merknader til søknaden kan du sende til sfvlpost@statsforvalteren.no, eller til Statsforvaltaren i Vestland, Njøsavegen 2, 6863 Leikanger.

Merk saka med referansenummer 2025/16072. Frist for å gje fråsegn er 7. september 2026.

Alle fråsegner vert registrerte i vår postjournal. Alle må difor skrive under med fullt namn.