Forslag av utvida vern ved Småge i Aukra kommune

Om du har merknadar til forslaget, kan du sende det til Statsforvaltaren i Møre og Romsdal, sfmrpost@statsforvalteren.no og skrive i emnefeltet «2024/5984 Høyring av utvida vern ved Smågevatnet naturreservat». 

Alle kan komme med merknadar innan 18. september 2026.

Kvifor vern?

Området ved Småge omfattar ei av dei best skjøtta kystlyngheiane i regionen. Området er klassifisert med svært høg verdi (A-verdi) og er eit nasjonalt referanseområde for nordvestnorsk kystlynghei. Kjerneområdet, det eksisterande naturreservatet ved Smågevatnet, omfattar det største ferskvatnet i kommunen og er eit viktig våtmarksområde for fugl. Med utvidinga vil omkringliggjande kystlynghei og hekkeholmar bli inkluderte, og det nye naturreservatet vil utgjere eit variert og samanhengande landskap med stor verdi for biologisk mangfald, friluftsliv og kulturhistorisk skjøtsel.

Føremålet med utvidinga er å sikre viktige og trua naturverdiar som i dag er svakt representerte i eksisterande verneområde, særleg kystlynghei, men òg våtmark og tilhøyrande dyreliv.

Kystlynghei er ein sterkt trua naturtype som er avhengig av aktiv skjøtsel, mellom anna gjennom beite og lyngbrenning. Ei utviding av vernet skal bidra til ei langsiktig og føreseieleg forvaltning av denne naturtypen.

Kva inneber forslaget?

Verneforma vidareførast som naturreservat (strengaste verneform etter naturmangfaldlova) og verneområdet blir utvida til å omfatte både land- og sjøareal, totalt om lag 5 000 dekar. Vernet skal ta vare på kystlynghei av nasjonal verdi, våtmarksområde og marine hekkeområde som er viktige leveområde for fugl, insekt og anna dyreliv.

Bruk og aktivitet i området

Målet er å kombinere vern og bruk. Beite, skjøtsel, jakt og fiske kan halde fram innanfor rammene av verneforskrifta og anna relevant lovverk. Området er også delvis statleg sikra som friluftsområde, og enkelt friluftsliv kan halde fram som i dag. Samstundes blir det foreslått enkelte avgrensingar av omsyn til sårbart fugleliv, særleg i hekkeperioden.

Det blir opna for nødvendige unntak knytt til samferdsel, energiforsyning, tryggleik og drift og vedlikehald av eksisterande infrastruktur.

Prosess og medverknad

Varsel om oppstart blei kunngjort hausten 2024. Statsforvaltaren har hatt tett dialog med Aukra kommune, grunneigarar og ulike statlege etatar og fått inn åtte merknader, mellom anna frå fylkeskommune, Kystverket, Fiskeridirektoratet og Kartverket. Merknadene er vurdert og har ført til justeringar i avgrensing, forskrift og namn på verneområdet.

Vidare saksgang

Etter høyringa vil Statsforvaltaren samanstille og vurdere innspel og utarbeide endeleg verneframlegg. Deretter blir saka sendt vidare til Miljødirektoratet og Klima- og miljødepartementet, før det blir fatta endeleg vedtak om vern ved kongeleg resolusjon.