Kongens fortjenstmedalje til Elin Spinnangr Lundegaard Salvesen

Kongens fortjenstmedalje blir tildelt personar som gjennom langvarig og særleg fortenestefull innsats har gjort ein viktig innsats for samfunnet.

– Gjennom eit langt liv har Elin Spinnangr Lundegaard Salvesen brukt sine evner, sin tid og sitt engasjement til å skape verdiar for andre. Ho har opna dører til kunnskap, teke vare på kulturarven vår og skapt fellesskap på tvers av generasjonar. Innsatsen hennar har sett varige spor i lokalsamfunnet, sa statsforvalter Gina Lund under overrekkinga.

Har sett varige spor som lærar

Salvesen arbeidde i over 30 år ved Eilert Sundt vidaregåande skole i Farsund. Som lærar i norsk, engelsk og tysk kombinerte ho fagleg kompetanse med eit sterkt engasjement for elevane. Gjennom vidareutdanning innan sosialpedagogikk, spesialpedagogikk og vaksenpedagogikk hadde ho eit særleg blikk for den enkelte elev og deira behov.

Kollegaer og tidlegare elevar trekkjer fram hennar evne til å sjå mennesket bak eleven, skape tryggleik og leggje til rette for meistring. Ho var òg ein viktig kulturberar ved skolen, mellom anna gjennom mange år med ansvar for skolens juleframsyningar.

– Elin formidla ikkje berre språk og kunnskap. Ho formidla òg tru på at alle har noko verdifullt å bidra med, sa Lund.

Kulturformidlar og ambassadør for Farsund

Ved sida av lærargjerninga har Salvesen i snart tre tiår vore ein sentral kulturformidlar gjennom rolla som vekter i Farsund.

I den tradisjonelle vekteruniforma har ho formidla lokal historie til både innbyggjarar og tilreisande, og slik bidrege til å halde ei viktig kulturhistorisk tradisjon levande.

– For mange har Elin vore det første møtet med Farsund. Ho har formidla historia om byen med varme, kunnskap og ekte engasjement. Gjennom åra har ho blitt ein framifrå ambassadør for både Farsund og regionen, sa statsforvaltaren.

Har teke vare på kulturarven

Salvesen har òg gjort ein stor innsats for norsk handverkstradisjon og kulturarv gjennom eit mangeårig engasjement i Lista Husflidslag.

Gjennom kurs, opplæring og formidling har ho arbeidd for å halde kunnskap om bunad, tekstilhandsverk og tradisjonelle teknikkar levande. Ho har vore oppteken av at kulturarven ikkje berre skal bevarast, men førast vidare til nye generasjonar.

– Elin har gjennom heile livet skapt møteplassar, delt kunnskap og inspirert andre til å ta del i kulturarven vår. Ho er ein viktig tradisjonsberar og eit førebilete for mange, sa Lund.

Ei høgt fortent utmerking

I talen understreka statsforvaltaren at Salvesens innsats strekkjer seg langt utover dei ulike rollene ho har hatt.

– Gjennom den ho er, har Elin bidrege til å skape identitet, tilhøyrsle og stoltheit i lokalsamfunnet. Farsund ville ikkje vore det same utan hennar utrettelige innsats, sa Lund.

På vegner av Hans Majestet Kongen overrekte statsforvaltaren Kongens fortjenstmedalje til Elin Spinnangr Lundegaard Salvesen.