Ny tilskotsordning skal styrke det førebyggande arbeidet for barn og unge
Det er no sett av 519 millionar kroner til kommunane for å styrke det førebyggande arbeidet for barn og unge. Midlane skal bidra til tidleg innsats, betre samordning og tryggare oppvekstmiljø i heile landet.
Kommunane kan no søkje om midlar gjennom den nye tilskotsordninga Kommunalt førebyggingsprogram for barn og unge. Ordninga skal styrke det førebyggande arbeidet i kommunane, sikre betre samordning av tenester og bidra til at barn og unge får tidleg og heilskapleg hjelp. Målgruppa er alle barn og unge, med særleg merksemd på dei som står i fare for å hamne i utanfor¬skap.
Kommunar og kommunesamarbeid kan søkje, og midlane kan nyttast både til universelle tiltak og målretta innsats innanfor oppvekstfeltet. Det er sett av 519 millionar kroner til fordeling i 2026, og lågast mogleg tilskot er 200 000 kroner.
Søknadsfristen er 22. april. Kommunane skal sende inn ein kortfatta søknad no, medan ein meir detaljert plan for bruken av midlane først skal leverast etter tildeling. Bufdir tek sikte på å gi svar i løpet av mai, og rapportering skal leverast innan 1. april 2027.
Meir informasjon om ordninga, søknadskriterium og prosess finn du på Bufdir sine nettsider: Tilskuddsordning: Kommunalt forebyggingsprogram for barn og unge | Bufdir