Høring: Utviding av to naturreservat i Lyngdal og Hægebostad kommunar

Områda vil samla bidra til å oppfylle nasjonale og regionale mål i skogvernet knytt til ivaretaking av rik blandingsskog i låglandet, gamal blandingslauvskog, låglandsskog med til dels høg bonitet, og skog med same kvalitetar som boreonemoral regnskog. 

Verneverdiar 

Kleppsfjellet og Slettafjellet naturreservat

Verneforslaget er ei utviding av det eksisterande naturreservatet Kleppsfjellet og Slettafjellet i Hægebostad kommune. Området har ein høg del rike skogtypar som lågurtskog og høgstaudeskog. I utvidingsområdet er det førekomstar av mykje storvakse lauvdominert skog med høg tettleik av store lauvtre, og innslag av verkeleg gamle og innhole lindetre. Utvidinga vil bidra til å dekke inn regionale manglar i skogvernet i Agder knytt til rik blandingsskog i låglandet, og gamal blandingslauvskog. Kleppsfjellet og Slettafjellet naturreservat med utviding vil også kunne bli ein del av eit større økologisk nettverk av verneområde på vestsida av innsjøen Lygne. 

Eiersland naturreservat

Verneforslaget er ei utviding av det eksisterande naturreservatet Eiersland i Lyngdal kommune. Vernekvalitetane i området er knytt til store, gamle og til dels hole edellauvtre, og den raudlista naturtypen lågurtedellauvskog. Ein kolle med eikeskog søraust i området har også nokolunde same kvalitetar som boreonemoral regnskog. Utvidinga av Eiersland naturreservat vil bidra til å dekke inn nasjonale manglar i skogvernet knytt til låglandsskog, til dels med høg bonitet. Av dei fylkesspesifikke manglane i skogvernet i Agder vil området bidra til å dekke inn rik edellauvskog med innslag av gamal eikedominert skog, samt skog med same kvalitetar som boreonemoral regnskog. 

Verneform 

Områda er føreslege verna som naturreservat, jf. naturmangfaldlova § 37. Dei to naturreservata har båe kome fram gjennom ordninga med frivillig vern av skog. Frivillig vern-ordninga inneber at områda er tilbudd staten for vern av grunneigar. Tilbodet er utarbeida som ein del av Norges Skogeierforbund sin avtale med Miljødirektoratet om å legge til rette for frivillig vern av skog. Kartavgrensing for dei to områda finn du i høgre marg. 

Innspel til verneplanarbeidet 

Føremålet med oppstartsmeldinga er å invitere til samarbeid om gjennomføring av prosessen. Me oppfordrar til å kome med innspel til verneplanarbeidet. Dette kan vere tilhøve ein meiner bør omtalast i forskriftene, reguleringar frå kommunane eller spesielle interesser som må takast omsyn til i den vidare verneprosessen for det enkelte området.  

Innspel kan sendast skriftleg til Statsforvalteren i Agder, Postboks 504, 4809 Arendal eller på e-post til sfagpost@statsforvalteren.no innan 24.08.2026. Me ber om at innspel blir merka med vårt arkivsaksnummer 2026/7300 og kva område det gjelder.