Sámegielåhpadus
Gájkka sámeoahppijn li riektá sámegielåhpadussaj, berustahtek gånnå årru lándan. Oahppijn guhti årro háldadimguovlon li riektá åhpadussaj sámegielan ja sámegiellaj. Skåvllåæjgádin la bajemus åvdåsvásstádus ållidittjat oahppij riektáv sámegielåhpadusá hárráj.
Oahppe válljij iesj makkir dajs gålmmå sámegielajs (nuortta-, julev- jali oarjjelsámegiella) sij sihti åhpadusáv. Skåvllåæjgádin la bajemus åvdåsvásstádus ållidittjat oahppij riektáv sámegielåhpadusá hárráj. Oahppopládnatjoahkke Máhtudaklåpptim – sámegiella le guoskavasj. Jus sijddaskåvlån ij la åhpadiddje mij máhttá åhpadit sámegielan, de hæhttu skåvllåæjgát fálat ietjá åhpadimvuogev sámegielan, duola dagu gájdosåhpadibme.
Fylkkamánne Nordlándan galggá gåtsådit váj oarjjel- ja julevsáme oahppe fáladuvvi gájdosåhpadimev riektáj ja dárboj milta, ja látjet dilev ja åvddånit fálaldagáv riektáj hárráj. Fylkkamánne vaddá tijmajt ja refusjåvnåv gålåjda ma tjuovvo åhpadimev suohkanijda ja priváhta skåvlåjda vuodoskåvlå dásen, madi joarkkaskåvlå oattjo refusjåvnåv sámeåhpadimes Åhpadusdirektoráhtas.
Åhpadusláhka kapihtal 6 tjielggi riektájt ja vælggogisvuodav sámegielåhpadusá hárráj.