Robek
Suohkana ma biednigijs ilá ålov adni ja ma e vielgijt mávse suohkanlága rávkalvisáj milta, tjáleduvvi regisstarij «Register om betinget godkjenning og kontroll» (Robek), julevsámegiellaj «Registar evtulasj dåhkkidime ja bærrájgæhtjo diehti». Fylkamánne galggá Robek-suohkanij budsjehtajt ja ekonomijaplánajt dárkestit, ja galggá aj dåhkkidit divna mierredusájt ma guosski lånajda ja guhkesájgge lájggomsjiehtadusájda.
Suohkanij dahkoduodastusá
Suohkana máhtti vaddet lådnadahkoduodastusájt. Gå suohkan vaddá dahkoduodastusáv låhkuj mij la 500 000 kråvnå jali ienebuv, de galggá Fylkamánne dåhkkidit dáv mierredusáv.
Dájddobiedniga
Suohkana máhtti dájddobiednigijt oadtjot, ma li biedniga majt suohkan máhttá ietjas dájdo milta adnet. Dá biedniga li oassen stáhta juollodimijs suohkansuorggáj. Fylkamánne juohká biednigijt fylka suohkanijda. Biedniga juogeduvvi departementa njuolgadusáj milta.
Suohkanijgasskasasj viddnudagá
Fylkamánne galggá dåhkkidit mierredusájt, ma guosski suohkanijgasskasasj viddnudagáj lådnaválldemij.