Små bruk møter dei største utfordringane
Om lag 1000 bønder i Rogaland produserer til saman nær 300 millionar liter mjølk årleg. Sjølv om 80 prosent av mjølka allereie kjem frå lausdriftsfjøs, blir framleis 54 millionar liter produsert i båsfjøs.
Mange av bøndene som framleis har båsfjøs driv i mindre omfang. Det gjer overgangen til lausdrift særleg krevjande. Store investeringar skal fordelast på færre kyr og mindre mjølkevolum, noko som kan gi svakare lønsemd.
Stor uvisse om investeringsbehovet
Ei spørjeundersøking blant mjølkebønder i Rogaland i 2022 viste at fleire vurderte å avslutte mjølkeproduksjonen innan 2034. Samstundes er det stor uvisse knytt til kor mange som vil investere i nye fjøs, og kor store kostnadene vil bli i åra framover.
For landbrukspartnarskapet i Rogaland blir det derfor ei viktig oppgåve å vurdere behovet for investeringsmidlar til mjølkesektoren. Kor mange bruk kan og vil satse vidare, og korleis vil auka byggekostnader, renteutgifter og andre kostnadsdrivarar påverke lønsemda?
Meir enn ei fjøsomlegging
For Rogaland handlar overgangen til lausdrift om meir enn dyrevelferd og byggtekniske krav. Det handlar om korleis framtidas mjølkeproduksjon skal sjå ut: Skal vi ha mange mjølkebruk spreidde over heile Rogaland, eller færre og større produsentar med ein større del av den samla produksjonen?
Mange båsfjøs ligg i område der gardane er små med krevjande struktur og terreng . Dersom mjølkeproduksjonen forsvinn der, kan det påverke både busetjing, kulturlandskap og aktivitet i lokalsamfunna.
Rogaland har eit sterkt miljø innan meieri, rådgiving, veterinærtenester, maskinentreprenørar og landbruksindustri. Talet på mjølkebruk, og som står for nær 50 prosent av verdiskapinga i jordbruket, er avgjerande for heile økosystemet rundt næringa.