Søk støtte til lokale klimatiltak innan 17. desember!
Klimasats gir kommunar og fylkeskommunar moglegheit til å realisere klimavennlege prosjekt.
Kommunar og fylkeskommunar som vil redusere utslepp av klimagassar og bidreg til omstilling til eit lågutsleppsamfunn, kan no søkje om midlar gjennom Klimasats-ordninga. Klimasats er ei tilskotsordning for å fremme lokale klimatiltak, i statsbudsjettet for 2026 er det foreslått å setje av 108,1 millionar kroner til ordninga.
Søknadsfristen er 17. desember 2025 kl. 23.59.
Klimasats gir støtte til politisk forankra klimatiltak der økonomisk støtte er utløysande for at prosjektet kan gjennomførast. Tilskotet kan dekkje meirkostnader ved klimavennlege løysingar, eller bidra til utvikling av nye tiltak som gir utsleppskutt på kort og lang sikt. Utlysinga skjer med atterhald om Stortinget sitt budsjettvedtak.
Statsforvaltaren i Vestland oppmodar alle kommunar og fylkeskommunen til å vurdere aktuelle prosjekt og sende inn søknad. Miljødirektoratet tek sikte på å gi svar på søknadene innan utgangen av mars 2026. Dersom det kjem fleire midlar til ordninga i løpet av året, kan det bli nye utlysingar.
Slik søkjer du
Søknadene skal leverast i Miljødirektoratet sitt elektroniske søknadssenter.