Statsforvalteren fikk nytt og kjønnsnøytralt navn 1. januar 2021. Det gamle navnet vårt var Fylkesmannen.

Olggustallan

Buohkain galgá leat vejolašvuohta olggustallat luonddus ja lagaš birrasis, ovdamearkka dihte vázzit luonddus, murjet ja čoaggit guobbariid, bivdit ja guolástit. Guovlluid heiveheapmi olggustallammii lea mávssolaš doaibma, mainna ovddidit álbmotdearvvašvuođa. 

Fylkkamánni galgá fuolahit nationála olggustallanberoštumiin gáddeavádaga, čázádagaid ja várreguovlluid oktavuođas. Fylkkamánni ovddasta guovlludásis stáhta, mii eaiggáda olggustallamii sihkkarastjuvvon eatnamiid.

Sihke Fylkkamánni, fylkkagielda ja gielda galgá váldit vuhtii álbmoga vejolašvuođaid johtit luonddus, go sii meannudit areálahálddašeami áššiid. Fylkkamánni sáhttá juolludit doarjaga doaimmaide, mat movttiidahttet olbmuid johtit luonddus, ja olggustallanguovlluid sihkkarastimii ja ásaheapmái.

Bivdu ja guolásteapmi

Buot fuođđut leat ráfáidahttojuvvon, jos eará ii leat mearriduvvon lágain dahje sierra mearrádusain. Luondduhálddašandirektoráhtta dat mearrida sierra šlájaid bivdoáiggiid, muhto gielddat sáhttet guhkidit dahje oanidit ovttaskas šlájaid bivdoáiggi. Gielddat leat eanaš fuođđohálddašanáššiid eiseváldin, fylkkagielddas fas lea bagadandoaibma, ja Fylkkamánni lea váidalaneiseváldi.

Fylkkamánnis lea ovddasvástádus hálddašit luosa, guvžžá ja gudjora, sáivaguollenáliid, mat leat sakka geahppánan ja muddejuvvon čáziid guollebivddu. Fylkkamánni čohkke bivdostatistihka luossa-, guvžá- ja gudjorbivddus, registrere mearraluossabivdui searvama ja juolluda doarjaga stáhta guolástanfoanddas. Goziheapmi lea mávssolaš guollenáliid fuolaheami ja nannema dáfus. Fylkkamánni gulahallá viššalit eananeaiggádiiguin ja bivdo- ja guolástanservviiguin, ja ovttasbargá lávgalagaid politiijain, Stáhta luonddugeahčuin ja Riddovávttain guollevalljodagaid geahču olis.

Luondduhálddašandirektoráhtas lea ovddasvástádus jogaid ja mearaid guolásteami muddemis, ja ráhkada luosa, guvžžá ja gudjora bivdonjuolggadusaid.

Fylkkagielddas lea ovddasvástádus muddekeahtes čázádagaid sáivaguollenáliin, mat eai leat áitojuvvon. Fylkkagielddas lea maid ovddasvástádus juolludit guollešaddadandoaibmalobiid.