Åejvieladtjh leah "Omsorgsplanen 2015" nænnoestamme mij strategijh jïh råajvarimmieh guhkiebasse gïetede, juktie hijven jïh byögkeles dïenesjh gorredidh gaajhkide båarasåbpoe almetjidie jïh dejtie mah hoksem daarpesjieh. Dah vihkielommes barkoesuerkieh leah jienebh barkijh hoksedïenesjinie, vielie daajroe, vielie ektiedahkoe jïh vielie medisijnen dåarjedimmie, dotkeme jïh kvaliteeteevtiedimmie, eadtjohke hokse mij leavloem beaja kultuvrelle jïh sosijalle råajvarimmide, jïh guejmievoete fuelhkine jïh voenges siebriedahkine.
Fylhkenålma edtja tsevtsiedæjja årrodh ihke tjïelth hoksedïenesjh biejjieöörnegasse biejieh, juktie båetijen aejkien haestemh dåastodh.
Gellie såarhts hokseviehkieh gååvnesieh
Fïereguhten almetjasse maahta viehkiem vedtedh goh raerie jïh bïhkedimmie, hïejmeviehkie, gåetiesujhteme jallh jeatjah dæjpeles viehkie, dåarjoehtæjjah, jïh viehkie jallh baalhka almetjidie mah joekoen leevles hoksebarkoem utnieh.
Hoksegåetie ij leah hokseviehkie
Gie edtja hoksegåetiem åadtjodh ij leah reaktavåaroemisnie healsoe- jïh hokselaakesne, jïh leah amma uvtemes akte sïejhme lååjkedimmiegåetie. Tjïelte maahta dïenesjem jïh viehkiem vedtedh disse mij ij jïjtje bearkedh dagkeres gåetesne, seammalaakan goh aktene sïejhme gåetesne.
Maahtah hokseviehkiem laejhtedh
Maahtah klååkedh jis vienhth datne ih dejtie hoksedïenesjidie åadtjoeh mejtie edtjh utnedh, jallh dastegh ih leah sïemes guktie tjïelte dov daerpiesvoetide vuarjasjamme. Ihke dïhte mij nænnoestimmiem dorjeme man bïjre datne ih leah sïemes, edtja nuepiem åadtjodh sov mïelem jarkelidh, edtjh klååkoem tjïeltese seedtedh. Dastegh ij klååkoem jååhkesjh, dle Fylhkenålmese seedtesåvva akten minngemosth nænnoestæmman.