Dette innholdet er skrevet før 2019 da antall fylkesmannsembeter gikk fra 16 til 10. Informasjonen kan være utdatert.

Fuolahanbálvalusat

Buot gielddat galget fállat bálvalusaid olbmuide, geat eai birge iehčanassii ja geat leat sorjavaččat geavatlaš dahje persovnnalaš veahkis, vai birgejit dábálaš doaimmain, dahje geain leat erenoamáš dárbbut, maid duogážin lea buohcuvuohta, doaibmahehttejupmi dahje eará dilli.

Eiseválddit leat nannen “2015 fuolahanplána” mii válddáhallá guhkes áiggi strategiijaid ja doaimmaid, maiguin sihkkarastet buriid ja almmolaš bálvalusaid buot vuorrasiidda ja fuolaheami dárbbašeddjiide. Mávssolepmosit áŋgiruššet dan ovdii, ahte livčče eanet bargit fuolahanbálvalusain, eanet diehtu, eanet ovttasdoaibman ja medisiinnalaš čuovvuleapmi, dutkan ja gelbbolašvuođa ovddideapmi, aktiiva fuolaheapmi, mas deattuhit kultuvrralaš ja sosiála doaimmaid ja searválasvuohta bearrašiin ja báikkálaš servodagain.

Fylkkamánni galgá bargat dan ovdii, ahte gielddat vuoruhit fuolahanbálvalusaid, nu ahte dat leat gergosat dustet boahtteáiggi hástalusaid.

Lea máŋggalágan fuolahanveahkki

Veahkki sáhttá leat neavvun ja bagadeapmi, ruovttuveahkki, ruovttubuohccedikšun dahje eará geavatlaš veahkki, doarjjagulahallanolmmoš, dudden (avlastning) dahje bálká olbmuide, geain lea ereliiggán lossa fuolahanbargu.

Fuolahanvisti ii leat fuolahanveahkki

Fuolahanvisttit eai juolluduvvo dearvvašvuođa- ja fuolahanlága vuođul, nuba dat leat rievtti mielde dábálaš láigovisttit. Gielda sáhttá fállat bálvalusa ja veahki olbmuide, geat ieža eai birge, dakkár visttiin seamma láhkai go dábálaš ruovttuinge.

Don sáhtát váidalit fuolahanveahki

Don sáhtát váidalit jos don oaivvildat ahte it oaččo fuolahanbálvalusaid, maidda dus lea vuoigatvuohta, dahje jos don it leat ovtta oaivilis dainna, mo gielda árvvoštallá du dárbbuid. Vai dat, gii lea mearridan ášši, man hárrái don it leat ovtta oaivilis, galgá oažžut vejolašvuođa rievdadit oainnus, de galggat don sáddet váidalusa gildii. Jos váidalus ii váldojuvvo vuhtii, de dat sáddejuvvo viidáseappot Fylkkamánnii, mii mearrida ášši loahpalaččat.

Vis mer