Ta omsyn til vassmiljøet i arealplanlegginga
I alle arealplanar må kommunen ta omsyn til vassmiljøet slik at vi kan nå målet om god tilstand, både økologisk og kjemisk, i norsk vatn.
Kommunen må særleg ta omsyn til
- forureining som forsuring, overgjødsling og spreiing av miljøgifter
- fysiske endringar som vassdragsregulering, hindringar som til dømes vegar og jernbaner, og grøfting og andre tiltak som styrer vatnet i kanalar
- biologiske påverknader som framande fiskeartar, rømd oppdrettsfisk og lakselus
Statsforvaltarens ansvar i vassforvaltninga
Statsforvaltaren har det miljøfaglege ansvaret og skal sørge for at kunnskapsgrunnlaget i Vann-Nett er oppdatert. Dette skjer i samarbeid med aktuelle sektormyndigheiter, fylkeskommunar og kommunar.
Arbeidet omfattar
- oppdatering av vasstype, tilstand og påverknader i vatnet
- koordinering av overvaking og registrering av overvakingsdata i portalen
Meir informasjon om kunnskapsgrunnlaget finn du i vannportalen.no.
Som regional miljømyndigheit skal Statsforvaltaren
- ha kunnskap om miljøtilstanden i vatnet og oversikt over status og kunnskapsbehov
- ha kunnskap om tiltak og verkemiddel på tvers av sektorar
- vurdere å fremje motsegn til reguleringsplanar
Kalking gir liv tilbake til vassdraga
Sur nedbør påverkar vatn og vassdrag i Rogaland, særleg i dei sørlege delane av fylket. Statsforvalteren kalkar derfor vassdrag som eit av dei viktigaste tiltaka for å redusere skadane frå forsuring og sikre gode levevilkår for fisk og anna liv i vassdraga.
I Rogaland blir om lag 60 innsjøar og ni laksevassdrag kalka. Tiltaket har bidrege til at laks, aure og fleire andre artar har kome tilbake i område der dei tidlegare forsvann på grunn av sur nedbør. Også artar som fiskeørn og oter er i ferd med å etablere seg att fleire stader.
Kalking er ein del av den nasjonale handlingsplanen for kalking av vassdrag, som gjeld for perioden 2022–2026, og er viktig både for naturmangfald, friluftsliv og lokal verdiskaping knytt til fiske.