Eigaren av sjøbuda ynskjer å rive bygget sidan det er i dårleg stand, og få av dei originale bygningsdelane er intakte. Eigedomen kan deretter seljast for å vere del av sentrumsutviklinga i Fosnavåg, på eit attraktivt område ned mot sjøen.
Herøy kommune gav dispensasjon og løyve til å rive bygget. Som kulturmynde klaga Møre og Romsdal fylkeskommune på avgjerda.
Eit regionalt kulturminne
Fosnavåg kystkulturmiljø har status som regionalt verneverdig i «Regional delplan for kulturminne av regional og nasjonal verdi». Vestbasbuda er samen med dei to andre sjøbuene på Notaneset, nokre av svært få attståande sjøhus frå seint 1800-tal. Fylkeskommunen viste i si klage til at den regionale, kulturfaglege verdien av området er tufta på heilskapen i kulturmiljøet og at sjøbudene som står att er avhengige av kvarandre for å oppretthalde verneverdien.
Sjøbudene står på eit areal regulert til sentrumsføremål, men med føresegner om historisk vern.
– Gjennom reguleringsplan for området er det fastsett føresegner som seier at bygga skal takast vare på, i praksis eit rivingsforbod, forklarer seniorrådgivar Therese Småland hos Statsforvaltaren.
Dagens situasjon er utgangspunktet for vern
Verneføresegnene som kom inn i gjeldande områdeplanen i 2015 er tufta på dagens situasjon med bygget sine noverande fasadeuttrykk.
– At det er få opphavlege element igjen frå 1880-talet er dermed ikkje tungtvegande argument for å kunne rive bygget, seier Småland.
Ho fortel at det i 2021 vart sett i gang eit arbeid med ein vidare plan for å utvikle området.
– Eit samtykke til riving vil difor gje uheldige verknader både for å ivareta kulturmiljøet, og ein framtidig plan for heile området.
Den bygningsfaglege rapporten som er utarbeidd i saka, viser at bygningskroppen kan bli restaurert og bevart.
– Bygget har slik ei framtid som del av kulturmiljøet. Riving går difor tydeleg imot intensjonane med verneføresegna. At det vert dyrt å restaurere bygget kan ikkje få avgjerande betydning i denne samanhengen, seier Småland.
Statsforvaltaren konkluderer difor med at vilkåra for å gje dispensasjon ikkje er oppfylt.